Në anën tjetër sindikalistë të SBASHK-ut thonë se nëse kërkesat e tyre për rritjen e pagave dhe përmirësimin e kushteve të arsimtareve nuk plotësohen nga Ministria, atëherë SBASHK-u do të krijojë strategjinë e tij të veprimit.

Ndërkohë, në Universitetin e Prishtinës është rritur numri i pranimeve për studentët e rinj dhe janë shtuar degë të reja për regjistrimin e tyre.

Sistemi arsimor në Kosovë vazhdimisht ka qenë në fokusin e kritikave për shkak të infrastrukturës së papërshtatshme në të cilën mësonjnë mijëra nxënës të Kosovës. Faji gjithmonë i është vënë periudhës tranzitore të pasluftës dhe fondeve të pakta që i janë akorduar arsimit në Kosovë.

Një numër i konsiderueshëm objektesh të arsimit të ulët dhe të mesëm kanë pasur mungesë kabinetesh dhe ambientesh normale shkollore, shumë prej tyre janë ambientuar në kontenierë dhe me qindra nxënës nuk kanë pasur kushte normale për mësim.

Premtimet e para të qeverisë së re të Kosovës i janë dhënë pikërisht arsimit. Kryeministri Hashim Thaçi e ka cilësuar arsimin si një nga prioritetet e qeverisë së tij.

Ndërkohë, ministri Enver Hoxhaj ka vënë gurthemelin për ndërtimin e dhjetra shkollave të reja në të gjithë Kosovën.

Përveç përmirësimit të infrastrukturës, premtimet e Ministrisë së Arsimit dhe qeverisë kanë qenë rritja e pagave të arsimtarëve dhe administratës.

Një komision në Ministrinë e Arsimit, ku bën pjesë edhe Sindikata e Bashkuar e Arsimit, Shkencës dhe Kulturës, javë më parë filloi procesin e licensimit të rreth 25 mijë arsimtarëve të nivelit fillor dhe të mesëm i cili këto ditë pritet të përfundojë.

Ky proces do të pasohet me rritjen e pagave të mësimdhënësve i cili do të varet nga niveli i përgatitjes dhe kualifikimit të tyre.

Këshilltari politik në Ministrinë e Arsimit, Nehat Mustafa, i ka thënë BBC-së se niveli i përgatitjes së mësimdhënësve do të ndahet në 8 kategori. Sipas tij, mësimdhënësit do të pajisen me leje pune dhe në krahasim me vitet e kaluara, kontrata e punës nuk do të përcaktohet më nga drejtoritë e shkollave.

“Fillimisht do të jenë licenca të përkohshme, sepse më vonë do të ketë kushte se si duhet të merret e të mbrohet, pra gjithcka do të varet nga performanca e mësimdhënësve. Është hera e parë që mësimdhënësi do të fillojë të japë llogari edhe për punën që e bën. Ministria do të rrisë pagat, por në të njëjtën kohë do të kërkojë përgjegjësi më të madhe dhe llogari nga mësimdhënësit. Dihet që në Kosovë nuk do të ketë paga lineare, do të caktohen kuotat për të gjitha shkallët e kualifikimit.

Nuk do të jetë rritja e pagës vetëm në mënyrë simbolike, si ka qenë në të kaluarën, nga shtatë ose tetë euro, sepse mendojmë që ajo është denigruese për mësimdhënësit, por do të jetë një ngritje nga e cila mësimdhënësit, besojmë që do të jenë të kënaqur dhe që dëshmon përkushtimin e ministrisë dhe të qeverisë për zgjidhjen e problemit social të mësimdhënësve,”- tha zoti Mustafa.

Sipas tij, arsimi në Kosovë nuk duhet të shihet si zgjidhje e problemeve sociale. Arsimtarët në Kosovë do t’ju nënshktrohen në vazhdimësi testeve të ndryshme dhe ata të cilët nuk tregojnë aftësi, sipas zotit Mustafa, mund të humbin vendin e tyre të punës.

Gjatë nëntë viteve të pasluftës, ku pakënaqësitë e ndryshme ndaj institucioneve i referoheshin edhe sistemit arsimor, sindikalistët e SBASHK-ut janë futur shpesh herë në greva me kërkesën e vazhdueshme për rritje te pagave të mësimdhënësve dhe përmirësimin e kushteve të tyre të punës.

Sipas kryetarit të Sindikatave të Bashkuara të Arsimit, Ali Shabani, ishte koha e fundit kur Ministria e Arsimit duhet të përfundonte procesin e licensimit të mësimdhënësve.

Premtimet e qeverisë dhe ministrisë për një arsim më të sofistikuar, sipas zotit Shabani, janë të mirëpritura, mirëpo mosrealizimi i tyre mund të sjellë krijimin e një strategjie veprimi nga ana e SBASHK-ut.

“Uroj që qeveria t’i mbajë premtimet, që ato të bëhen realitet, në të kundërtën SBASHK-u ka strategjinë e veprimit dhe nëse kjo qeveri dëshmohet si qeveritë e mëparshme, atëherë SBASHK-u do të veprojë, por akoma nuk është në fazën e veprimit, sepse jemi duke negociuar dhe kujtoj se është në momentin e fundit për t’i realizuar ato. Kujtoj që ministri i Arsimit dhe qeveria kanë vullnet për të realizuar atë objektiv që i kanë vënë vetes në fushatë, duke e konsideruar arsimin prioritet, dhe prioritetet duhet të shihen realisht dhe konkretisht,”- tha kryetari i SBASHK-ut.

Cilësia e mësimit shpesh herë është vlerësuar në një shkallë të lartë, mirëpo testi përfundimtar i maturës ka rezultuar jo i kënaqshëm ku vetëm 44.70 për qind e nxënësve kanë kaluar.

Shemsedin Gashi, zv.drejtori i gjimnazit "Sami Frashëri", njërit prej gjimnazeve më të vlerësuara në Prishtinë, ka thënë për BBC-në se përvoja, gradimi dhe rritja e pagave të arsimtarëve nëpër shkollat fillore dhe të mesme do të rrisë nivelin e arsimit në Kosovë.

“Sa i përket gradimit dhe licensimit në gjimnazin tonë, personeli mësimdhënës është qind për qind i kualifikuar, janë të gjithë me shkollë superiore, kemi pasur pengesa vetëm në gjuhë të huaja, në gjuhën angleze, por edhe ky kuadër sivjet është plotësuar me kualifikim superior, prandaj edhe në këtë drejtim besoj që do të shkojmë shumë përpara”, thotë Shemsedin Gashi.

Ministria e Arsimit ka bërë të ditur se në të gjithë Kosovën, deri në fund të muajit shtator do të ndërtohen mbi 30 shkolla të reja, nga 80 të tilla të cilat priten të ndërtohen brenda afatit të vitit shkollor, me një buxhet prej rreth 32 milionë eurosh.