SHKUP - Maqedonia ka bërë përparim në përmbushjen e kushteve të vendosura për fillimin e negociatave për anëtarësim në BE. Kështu është shprehur sot Eurokomisioneri për Zgjerim Oli Rehn pas takimit të sotëm me shefin e diplomacisë maqedonase, Antonio Miloshoski dhe z/kryeminstrin, Ivica Bocevski.
“Është bërë progres në reformimin e gjyqësisë dhe policisë, si dhe në përmbushjen e tetë kritereve për fillimin e negociatave për anëtarësim në BE. Mirëpo, sërish stabiliteti politik është fusha në të cilën duhet më shumë të punohet”, theksoi Rehn në konferencën për shtyp. Rehn ka ftuar Maqedoninë të realizojë akoma reforma te reja të rëndësishme dhe të domosdoshme, që të mund të filloj negociatat për anëtarësim në BE.
Ndërkaq, zëvendëskryeminsitri, Bocevski ka deklaruar se vendi ka realizuar 75 për qind të kushteve që janë vendosur si parakushte nga KE për marrjen e datës për fillimin e negociatave.
Bocevski theksoi se për proceset eurointegruese në Maqedoni ekziston konsensus i plotë. Para këtij takimi zyrtarët e lartë të Maqedonisë janë takuar edhe me nënkryetarin e KE-së, Zhak Baro. Pas këtij takimi edhe Zhak Baro theksoi se Maqedonia mund të pres liberalizim të regjimit të vizave në vitin 2009.
(a.s/Balkanweb/INA)