Ata akuzohen për zhdukjen e biznesmenit shqiptar nga Maqedonia, Remzi Hoxha, 13 vjet më parë.

Të mërkurën kreu i opozitës, Edi Rama, i kërkoi kryeministrit Sali Berisha të shkarkonte nga detyra Drejtorin e Përgjithshëm të Tatimeve Arben Sefgjini dhe të distancohej publikisht nga vrasja e Remzi Hoxhës.

Zoti Rama tha se qëndimi i kreut të shtetit për të mos shkarkuar zotin Sefgjini ishte në kundërshtim flagrant me etikën shtetërore e qeverisëse.

Arben Sefgjini është një nga katër të pandehurit të cilët, kur ishin punonjës të shërbimit sekret shqipëtar, u akuzuan se patën rrëmbyer dhe torturuar me pasoja të rënda biznesmenin Remzi Hoxha.

Pas vendimit të Gjykatës së Krimeve të Rënda për arrest shtëpiak për zotin Sefgjini, mediat verifikuan se Drejtori i Tatimeve nuk po kryente masën e arrestit por vazhdonte të ishte në detyrë.

Kryeministri Berisha tha se vendimi i gjykatës nuk është pezullim detyre dhe se zoti Sefgjini është zhdëmtuar njëherë nga gjykata për këtë çështje pasi, sipas tij, nuk kishte prova të mjaftueshme.