Jose Manuel Barroso tha këtë pas bisedimeve me presidentin serb Boris Tadiq, i cili po i prinë delegacionit më të madh zyrtar që ka ardhur vitet e fundit në Bruksel.

Në korrik, administrata e zotit Tadiq arrestoi ish-udhëheqësin serb të Bosnjës, Radovan Karaxhiq, pas trembëdhjetë vjet në arrati dhe e ekstradoi atë në Hagë, ku është në gjyq për gjenocid dhe krime lufte.

Por BE këmbëngul se edhe komandanti i tij ushtarak, gjenerali Ratko Mlladiq duhet të arrestohet para se Serbia të mund t'i afrohet anëtarësimit të plotë në këtë klub.

Siç njofton nga Brukseli korrespondentja e BBC-së Oana Lungjesku,
është hera e parë që një zyrtar i lartë i BE-së ka përmendur një datë se kur Serbia do të mund të bëjë hapin tjetër të madh drejt Evropës, por ky ende nuk është premtim.

Shumëçka do të varet nga prokurori i Gjykatës së KB për krime lufte, Serge Brammertz.

Ai shkon në Beograd javën e ardhshme për të vlerësuar nëse Serbia po bashkëpunon plotësisht me gjykatën e Hagës.

Sidoqoftë, zoti Barroso tha se qeveritë e BE-së duhet ta pranojnë arrestimin e Radovan Karaxhiqit si një moment të rëndësishëm.

Ndonëse BE nënshkroi një marrëveshje të shumëvonuar për tregti dhe politikë me Serbinë më herët këtë vit, për t'i dhënë shtytje shanseve të zotit Tadiq në zgjedhje, zbatimi i saj është ende pezull për shkak se Holanda, vendi ku ndodhet gjykata e KB-së për krime të luftës, dëshiron që Beogradi të dëshmojë se po bën çmos për të gjetur gjeneralin Mlladiq, i cili vazhdon të jetë në arrati.

Presidenti Tadiq premtoi se Serbia do të bëj çmos për të përshpejtuar procesin.