BEOGRAD- Kryeministri serb Mirko Cvetkovic në reagimin e tij në lidhje me këtë cështje, sic citon Radio Europa e Lirë, ka thënë se qeveria serbe nuk pranon EULEX: "Procesi i rikonfigurimit të UNMIK-ut ka filluar pa pjesëmarrjen e Serbisë dhe ne insistojmë që të jemi pjesë e këtij projekti dhe insistojmë në atë që zgjidhjet të miratohen. Kjo që ata kanë bërë tani, nuk është pjesë e asaj që kemi kërkuar"

Ministri i Jashtëm serb, Vuk Jeremic në reagimin e tij deklaron se EULEX nuk mund të funksionojë pa Serbinë dhe shpreson se gjatë ditëve të ardhshme do të jetë në kontakt me UNMIK-un dhe se bisedimet do të vazhdojnë edhe për statusin e Kosovës.

“Ne do të bisedojmë dhe do të flasim për ato që i janë dërguar zotit Zannier. Në fund shpresojmë se do të vijë deri te një marrëveshje që do të konfirmohet në Këshillin e Sigurimit" ka thënë Jeremic.

Kryediplomati serb beson se mendimi i Gjykatës Ndërkombëtare në lidhje me statusin e Kosovës do të jetë pozitiv për Serbinë. Ky mendim- sipas Jeremic- “do të krijojë një atmosferë ndërkombëtare në të cilën qeverisja në Prishtinë nuk do të ketë zgjidhje përveç të ulet dhe të bisedojë me Beogradin rreth çështjes së statusit", citon ministrin e Jashtëm Jeremic, Radio Europa e Lirë.

Ministri i Mbrotjes Dragan Shutanovac, gjatë një vizite në Komunën e Bujanovcit, kundërshtoi firmosjen e marrëveshjes mes EULEX dhe UNMIK. Shutanovac thotë se një vendim i tillë shkel të drejtat ndërkombëtare.
"Ky akt nuk ka mbështetjen e Këshillit të Sigurimit të Kombëve të Bashkuara. Kjo është një rrugë e keqe e zgjidhjes së problemit në Kosovë e Metohi. Nëse kriza nuk zgjidhet në linjën e insistucioneve ndërkombëtare, kam frikë se nuk do të zgjidhet kurrë”, ka thënë ministri Shutanovac 

Marrëveshja teknike për bartjen e aseteve tek misioni i BE-së për polici dhe drejtësi mes UNMIK dhe EULEX u firmos mbrëmë në Prishtinë. Kjo marrëveshje shënon fillimin e rikonfigurimit të UNMIK-ut. Procesi i rikonfigurimit të UNMIK-ut është pjesë e planit të Sekretarit të Përgjithshëm të OKB-së, Ban Ki Mun, proces që duhet të përfundojë deri në vjeshtë, të këtij viti. Misioni për polici dhe drejtësi i BE-së, pritet të shtrihet në tërë teritorin e Kosovës dhe do të ketë mbi dy mijë pjestarë. UNMIK-u, megjithatë do të mbetet në Kosovë, me një staf shumë të reduktuar.
(s.g/Balkanweb)