Banka e Gjakut në Lushnje ka mungesa të mëdha ndërsa numri i dhurimeve vullnetare është ulur ndjeshëm

LUSHNJE- Të sëmurët me talasemi, nëpërmjet shoqatës së tyre, i kanë bërë thirrje edhe një herë opinionit dhe dhuruesve të gjakut se ndodhen në rrezik për shkak të mungesës së rezervave të gjakut. Thirrja është bërë nga Banka e gjakut në Lushnje në emër të mbi 300 të sëmurëve për tu kthyer dhurimit të gjakut në shenje mirënjohjeje për të shpëtuar, jo një jetë, por qindra. Rezervat e gjakut janë në kufijtë kritikë që do të thotë se nuk përballohen nevojat për të sëmurët e kartelizuar dhe urgjencat. Dhurimi vullnetar është në nivele të papërfillshme, ndërsa dhurimi me pagesë ka shifra të ulëta, krahasuar me muaj më parë. Në këto kushte, kryetari i shoqatës të të sëmurëve me talasemi, Musa Zeneli, pohon se duhet të zbatohet ligji për importin e gjakut, kjo do të lehtësojë punën dhe do të zgjidhë krizën. Ndërsa mjekët e Lushnjes, të cilët e shohin konkretisht emergjencën e transfuzionit kërkojnë ta zgjidhim problemin e vjetër nëpërmjet dhurimit me donator vendas. ”Dhurimi vullnetar është cilësi jete. Ne duhet t’i drejtohemi seriozisht rezervave, te cilat mund t’i sigurojmë në vend, në rast se do të dimë ta menaxhojmë më mirë situatën. Duhet të synojmë në sigurimin më parë të rezervave, pastaj të garantojmë edhe cilësinë e gjakut”,- tha mjekja pediatre Hatixhe Spahiu, pas një takimi të organizuar dje me specialistë në spitalin e Lushnjes. Janë me dhjetëra të sëmurë me talasemi nga rrethet Vlorë, Fier, Berat, Rrogozhine etj, që marrin gjak në Lushnje.