Por nga këta persona të  kategorive që përfitojnë nuk lihen mënjanë edhe kategori të veçanta individësh, që me ligje dhe akte nënligjore të veçanta, përfitojnë shërbim shëndetësor stomatologjik falas. Gjithashtu projektligji “Për shërbimin shëndetësor stomatologjik në Republikën e Shqipërisë” parashikon që për ushtrimin e këtij profesioni, është i detyrueshëm licencimi i institucioneve, në të kundërt përbën kundërvajtje administrative dhe këto subjekte gjobiten me një shumë prej 50 000 lekësh si edhe veprimtaria e tyre mbyllet. Personeli i punësuar në klinikat dentare duhet të ushtrojë veprimtarinë në përputhje me rregullat e miratuara nga ministri i Shëndetësisë, në rast se shkelen ligjet, këta punonjës gjobiten me 50 000 lekë, dhe në rast së ky veprim përsëritet sërish, atëherë subjekti rrezikon të mbyllet. Përpos këtyre, ky projektligj synon edhe vendosjen e shërbimit shëndetësor stomatologjik falas në të gjitha  institucionet arsimore të nivelit të detyrueshëm. Gazeta boton të plotë 14 nenet e projektligjit, të cilat synojnë lehtësimin e shërbimit dentar në Shqipëri.

Në mbështetje të neneve 81, pika 1 dhe 100 të Kushtetutës, me propozimin e ministrit të Shëndetësisë, Këshilli i Ministrave

Vendosi:
Kreu 1
Dispozita të Përgjithshme
Neni 1
Qëllimi dhe fusha e zbatimit

Ky ligj ka për qëllim të përcaktojë rregullat për organizmin dhe funksionimin e shërbimit shëndetësor stomatologjik në Republikën e Shqipërisë.
Ky ligj zbatohet nga/ndaj personat/ve, fizikë dhe juridikë, vendas ose të huaj, të cilët ushtrojnë veprimtari në fushën e shërbimit shëndetësor stomatologjik në Republikën e Shqipërisë.

Neni 2
Financimi i shërbimit shëndetësor stomatologjik publik
1. Në institucionet e shërbimit shëndetësor stomatologjik publik ofrohet falas shërbimi, profilaktik dhe mjekues, stomatologjik, për:
a) personat nga mosha 0 deri në 18 vjeç;
b) të shtruarit dhe ata që trajtohen në institucione spitalore publike, për mjekim urgjence;
c) kategori të veçanta individësh, që, me ligje dhe akte nënligjore të veçanta, përfitojnë shërbim shëndetësor stomatologjik falas.
2. Shteti merr përsipër të mbulojë pjesërisht:
a) shërbimin e urgjencave stomatologjike, për moshat mbi 18 vjeç;
b) shërbime stomatologjike, në Departamentin e Stomatologjisë, në Fakultetin e Mjekësisë;
c) Shërbime stomatologjike në institucionet stomatologjike publike.
3. Masa dhe mënyra e kontributit të shtetit për shërbimet e parashikuara në pikën 2, të këtij neni, përcaktohen me vendim të Këshillit të Ministrave.

Neni 3
Shërbimi i urgjencës stomatologjike
1. Shërbimi i urgjencës stomatologjike ofrohet ne:
a) institucionet publike shëndetësore spitalore;
b) Institucionet publike shëndetësore stomatologjike ambulatore/
2. Në ato institucione shëndetësore, ku nuk mund të ofrohet shërbimi i urgjencës, sipas pikës 1, të këtij neni, lidhen kontrata shërbimi me subjekte që ofrojnë shërbim stomatologjik privat.

Neni 4
Shërbimi shëndetësor stomatologjik në institucionet arsimore
1. Shërbimi profilaktik, diagnostikues dhe edukimi shëndetësor stomatologjik ofrohen në të gjitha institucionet arsimore të nivelit të detyrueshëm.
2. Ministria e Shëndetësisë dhe Ministria e Arsimit dhe Shkencës nxjerrin udhëzimin e përbashkët për funksionimin dhe organizimin e këtij shërbimi në këto institucione arsimore.

Kreu II
Institucionet shëndetësore stomatologjike, organizimi dhe funksionimi i tyre.

Neni 5
Institucionet, që ofrojnë një shërbim shëndetësor stomatologjik
1. Shërbimi shëndetësor stomatologjik ofrohet nga:
a) institucionet shëndetësore stomatologjike publike.
b) institucionet shëndetësore stomatologjike private
2. Mënyra e organizimit dhe funksionimit të institucioneve shëndetësore stomatologjike përcaktohen me urdhër të ministrit të Shëndetësisë.

Neni 6
Licencimi
1. Të gjithë personat, fizikë dhe juridikë, që ushtrojnë veprimtarinë në shërbimin shëndetësor stomatologjik, licencohen pranë Ministrisë së Shëndetësisë ose autoriteteve të autorizuara prej saj.
2. Të gjitha subjektet e licencuara, që ushtrojnë veprimtari në fushën e stomatologjisë, janë të lira të bëjnë publicitet, duke qenë transparente dhe në përputhje me të drejtën, që i njeh ky ligj dhe aktet nënligjore, në zbatim të tij.
3. Procedurat dhe kriteret e licencimit përcaktohen me vendim të Këshillit të Ministrave.

Neni 7
Personeli i shërbimit shëndetësor stomatologjik
1. Shërbimi shëndetësor stomatologjik ofrohet nga personeli:
a) mjek stomatolog;
b) ndihmësmjek stomatolog;
c) laborant dentar
2. Personeli i shërbimit shëndetësor stomatologjik e ushtron veprimtarinë në përputhje me rregullat e miratuara nga ministri i Shëndetësisë.

Kreu III
Mbikëqyrja në shërbimin shëndetësor stomatologjik

Neni 8
Mbikëqyrja
Mbikëqyrja në shërbimin shëndetësor stomatologjik kryher nga Inspektorati Shëndetësor Stomatologjik.

Neni 9
Inspektorati Shëndetësor Stomatologjik
1. Në varësi të Ministrisë së Shëndetësisë organizohet dhe funksionon Inspektorati Shëndetësor Stomatologjik.
2. Inspektorati Shëndetësor Stomatologjik është organi ekzekutiv, i specializuar për kontrollin e zbatimit të këtij ligji dhe të akteve nënligjore, që rregullojnë shërbimin shëndetësor stomatologjik.
3. Struktura dhe organika e Inspektoratit shëndetësor Stomatologjik miratohen nga Kryeministri, me propozimin e ministrit të Shëndetësisë.
4. Rregullat e funksionimit të Inspektoratit Shëndetësor Stomatologjik miratohen nga ministri i shëndetësisë.

Kreu IV
Kundërvajtjet administrative

Neni 10
1. Kur nuk përbëjnë vepër penale, shkeljet e mëposhtme përbëjnë kundërvajtje administrative dhe dënohen:
a) Shkelja e nenit 6, me gjobë 50 000 lekë dhe me ndërprerje të veprimtarisë, deri në plotësimin e dokumentacionit, sipas legjislacionit në fuqi.
b) Shkelja e rregullave, të përmendura në pikën 2, të nenit 7, të këtij ligji, me gjobë deri në 50 000 lekë dhe, në rast përsëritjeje, me mbyllje të veprimtarisë.
2. Autoriteti përgjegjës për vënien dhe ekzekutimin e gjobave është Inspektorati Shëndetësor Stomatologjik.

Neni 11
Ankimi
Procedurat për vënien e gjobave për kundërvajtje administrative, dhe ankimi për to bëhen në përputhje me ligjin nr.7679, datë 7.4.1993, “Për kundërvajtjet administrative”, të ndryshuar.

Kreu V
Dispozita të fundit

Neni 12
Nxjerrja e akteve nënligjore
1. Ngarkohet Këshilli i Ministrave të nxjerrë akte nënligjore në zbatim të neneve 2, pika 3, dhe 6, pika 3.
2. Ngarkohet ministri i Shëndetësisë të nxjerrë urdhrat, në zbatim të neneve 5, pika 2, 9, pika 4, dhe 7, pika 2.
3. Ngarkohet Ministria e Arsimit Shkencës, që, në zbatim të pikës 2, të nenit 4, të nxjerrë udhëzimin e përbashkët me Ministrinë e shëndetësisë.

Neni 13
Shfuqizime
Ligji nr.8167, datë 21.11.1996 “Për shërbimin shëndetësor stomatologjik”, i ndryshuar, si dhe akte të tjera, që bien në kundërshtim me këtë ligj, shfuqizohen.

Neni 14
Hyrja në fuqi
Ky ligj hyn në fuqi 15 ditë pas botimit në “Fletoren Zyrtare”.