ATHINE- Në komunikatë për shtyp ministria greke e Rendit njofton se do të shtyjë për një muaj datën e kthimit të emigrantëve të huaj në Greqi. Kështu afati i fundit për të gjithë emigrantët që janë në Shqipëri me pushime, për tu kthyer në Greqi nuk do të jetë 15 shtatori, por 15 tetori.

Vendimi është marrë nga ministri grek i Brendshëm, Prokopis Pavlopulos me qëllim lehtësimin e lëvizjes së emigrantëve të cilët plotësojnë kushtet e ligjit të emigracionit. Në këtë ligj përfshihen të gjithë ato emigrantë që kanë leje të vlefshme dhe ato që leja u ka skaduar, por që kanë bërë kërkesë për rinovimin e saj dhe e kanë dorëzuar në kohë sipas rregullave.

Qeveria greke beson se me kësaj mase do të lehtësohet edhe hyrja e emigrantëve në dogana, ku gjatë kësaj periudhe është vënë re dhe një fluks i madh.
Vendimi i ministrisë së Brendshme greke është shpërndarë në të gjitha pikat kufitare tokësore, ajrore dhe detare greke. Ky njoftim i shtohet qarkores për lejen emigrantëve që ka hyrë në fuqi që më 20 qershor.

(s.g/NEWS24/Balkanweb)