TIRANE- Kryetarit të Bashkisë së Pukës i vjedhin pistoletën brenda në makinë, gjatë një ceremonie varrimi në Kamëz. Autori, një 14-vjeçar që sipas policisë, pavarësisht moshës është vjedhës profesionist, kishte përfituar ngaqë automjeti nuk ishte mbyllur me çelës. Oficerëve të Komisariatit numër 5 të Policisë së Tiranës u janë dashur 90 minuta për të zbuluar hajdutin adoleshent. Sipas burimeve policore, kreu i bashkisë së Pukës, Rustem Struga, ka qenë i pranishëm në një varrim në Kamëz. Ai nuk e ka menduar se edhe në vende të tilla mund të bëhej "viktimë" e grupeve vjedhëse dhe nga nxitimi kishte lënë mjetin e hapur. Hajduti adoleshent Granit M., ka përfituar nga kjo duke hapur makinën dhe vjedhur prej andej pistoletën e bashkiakut. Ky i fundit ka sinjalizuar policinë. Oficerëve të komisariatit numër 5 u ka ngjallur dyshime prania e hajdutit adoleshent në varreza, dhe e kanë shoqëruar atë. I gjendur përballë pyetjeve në komisariat, Graniti ka pranuar autorësinë e vjedhjes, duke u mundur të përfitonte nga lehtësirat që mund t'i bëheshin në klasifikimin e akuzës dhe në gjykatë.

(s.g/GazetaShqiptare/Balkanweb)