TIRANE- Arsimi shqiptar do të mbështesë të rinjtë e zonës së Luginës së Preshevës. Në takimin e zhvilluar sot në kryeministri mes kreut të qeverisë Sali Berisha dhe përfaqësuesve të një delegacioni nga Lugina e Preshevës, ndër të cilët deputetin shqiptar në parlamentin serb z.Riza Halili si dhe kryetarët e Komunave dhe të Kuvendeve të Preshevës dhe Bujanovcit. Përfaqësuesit e delegacionit nga Lugina e Preshevës e njohën Kryeministrin me problematika të ndryshme në komunat tyre dhe veçanërisht me problemin e njohjes së diplomave të shqiptarëve të marra në Universitetin e Prishtinës si dhe probleme të tjera lidhur me arsimimin e të rinjve të kësaj krahine. Kryeministri Berisha është shprehur i gatshëm  të mbështesë zgjidhjen e problemeve dhe kërkesave që autoritetet e Luginës së Preshevës i parashtruan si dhe u shpreh se arsimi shqiptar është i hapur ndaj të rinjve të kësaj zone duke shpresuar që edhe problemi i njohjes së diplomave të Universitetit të Prishtinës të shkojë shumë shpejt drejt zgjidhjes. (a.r/news24/balkanweb)