TIRANË - Anëtari i Kryesisë së Partisë Demokratike, njëkohësisht deputet i PD-së, Aleksandër Biberaj, ka shprehur mbështetjen e tij ndaj kandidaturës së Besnik Mustafaj për kreun e PD-së së Tiranës. Në një njoftim për median, Biberaj vlerëson aktivitetin politik të Mustafaj që nga krijimi i PDSH-së e deri më sot, sidomos në kryeqytet, konkretizuar kjo edhe me zgjedhjen e tij në mënyre të drejtpërdrejtë disa herë si deputet i Tiranës. Aleksandër Biberaj e konsideron kandidaturën e Mustafaj si një kandidaturë dinjitoze, me autoritet dhe reputacion për drejtimin e demokratëve të Tiranës, me qëllim fitoren e një mandati të dytë qeverisës nga ana e PD-së dhe e së djathtës. “Vetë formimi intelektual dhe qytetar i z. Mustafaj, si dhe karriera e tij e suksesshme politike dhe diplomatike, janë garancia më e mirë për përfaqësimin dhe mbrojtjen e interesave të demokratëve të Tiranës”, tha Biberaj.
(a.s/Balkanweb)