TIRANE- Dy kandidaturat që sipas PD-së ishin konkurrentë të mundshëm për kreun e PD-së së Tiranës, Biberaj dhe Shehri dhanë dje mbështetjen e tyre për kandidaturën e Mustafajt. Kjo bën që Mustafaj, pavarësisht procesit të gjatë, të jetë pa rivalë deri në fillimin e procesit zgjedhor që pritet të hapet shumë shpejt në PD. Biberaj e bëri publike mbështetjen e tij për Besnik Mustafajn me të mbërritur nga SHBA-ja, ku ishte i ftuar për të ndjekur nga afër fushatën zgjedhore të kandidatëve për president. Në një njoftim për shtyp, ai shprehet se Mustafaj ka një kontribut të rëndësishëm që nga krijimi i PD-së e deri sot. “Sidomos në kryeqytet, konkretizuar kjo edhe me zgjedhjen e tij në mënyrë të drejtpërdrejtë disa herë si deputet i Tiranës”, - bën të ditur zyra e shtypit e deputetit Aleksandër Biberaj. Më tej ai shpreh konsideratën e tij se Mustafaj është kandidaturë dinjitoze, me autoritet dhe reputacion për drejtimin e demokratëve të Tiranës. Deputeti vë në dukje dhe suksesin e karrierës së Mustafajt në diplomaci dhe se ka përfaqësuar më së miri interesat e demokratëve të kryeqytetit në parlament. Ish-drejtori i Burgjeve, Shehri, i cili u konsiderua si një kandidaturë e fortë për PD-në e Tiranës, dha gjithashtu mbështetjen për Mustafajn në garën e tij për të marrë kreun e degës së kryeqytetit. “Mbështes kandidaturën e Mustafajt, dhe unë s’e kam hedhur kandidaturën për kreun e PD-së së Tiranës”, - u shpreh dje Shehri. Më tej ai theksoi se nuk ka ushqyer ndonjë ide për të kandiduar në krye të kësaj dege. Biberaj është anëtar i kryesisë së PD-së në qendër, ndërsa Shehri, një anëtar i kësaj partie. Edhe pse këto kandidatura dhanë mbështetjen e tyre për Mustafajn, nuk ndodhi kështu me anëtarët e tjerë të kryesisë së PD-së, të cilët nuk dhanë asnjë koment apo mbështetje për kandidatin e vetëm për kreun e PD-së së Tiranës. Omer Stringa, anëtar kryesie por edhe anëtar i Këshillit Bashkiak të Tiranës, u shpreh dje se “kandidatura e tij ende nuk është zyrtare. Varet se ç’kandidatura do të dalin më vonë”. Anëtari tjetër i kryesisë, Aldo Bumçi u shpreh se nuk ka ndonjë koment lidhur me këtë fakt, por bëri të ditur se në ditët në vijim do të ketë mundësi të japë një mendim për këtë çështje. Ndërsa anëtari tjetër i kryesisë, Edmond Spaho nuk mund të shprehte asnjë koment për kandidimin e Mustafajt, pasi ishte i angazhuar në takime pune në Korçë, ku dje kryeministri Berisha përuroi disa investime. Të premten e kaluar, deputeti demokrat Besnik Mustafaj shpalli kandidaturën e tij për kreun e PD-së së Tiranës. Me këtë kandidim, sipas tij, do t’i japë një frymë tjetër degës më të madhe të PD-së në të gjithë Shqipërinë. Drejtuesit e PD-së në Tiranë nuk kanë dashur ta komentojnë një gjë të tillë. Kryetari aktual, Sokol Olldashi, i cili pritet të mos kandidojë më për këtë post, nuk është shprehur për kandidimin e Mustafajt.

(s.g/GazetaShqiptare/BalkanWeb)