GJIROKASTER - Ende alarmante paraqitet gjendja mes fshatrave Goricë dhe Terihat ku flakët e zjarrit kanë mbërritur deri në rrugën nacionale Gjirokastër-Kakavijë. Për pasojë rruga nacionale është bllokuar ndërkohë që zjarri është duke rrezikuar edhe banesat e fshatrave. Zjarri i rënë midis fshatrave Goricë dhe Terihat në Dropullin e Poshtëm mësohet të ketë djegur mbi 10 ha kullota. Sipas korrespondentes së “Neës24” mësohet se flakët janë duke u afruar në banesat e fshatit Terihat çka ka sjellë edhe evakuimin e banorëve të zonës.
Për rreth dy orë zjarrfikëset dhe banorë të shumtë janë duke u munduar të shuajnë flakët e zjarrit e cila ka alarmuar zonën. Era ka favorizuar përhapjen e flakëve dhe për pasojë është duke u rrezikuar edhe djegia e një fabrike letre e cila ndodhet pranë zonës së zjarrit.
Në vendin e ngjarjes ndodhen edhe forca të policisë të cilët po mundohen të kërkojnë ndihmë edhe nga rrethet e tjera pasi zjarrfikëset e Gjirokastrës janë vetëm tre.
Saranda dhe Tepelena duket se janë treguar të gatshme për ti ardhur në ndihmë zjarrfikëseve për të fikur zjarrin i cili gjithmonë e më shumë po bëhet i rrezikshëm për banorët.
Ende nuk dihen shkaqet e këtij zjarri të madh megjithatë ekspertët janë duke etuar për të gjetur edhe shkakun e zjarrit.
(a.s/Balkanweb)