TIRANE - “U mbush dita e tetë që Sali Berisha, kryeministri me shenjën e korrupsionit, merret publikisht me çështje thellësisht anësore, kur skandalet, akuzat, arrestimet këtu e jashtë Shqipërisë, i përplasen në fytyrë, duke kërkuar shpjegime të qarta prej tij”. Kështu ka deklaruar sot në emër të PS-së, nënkryetari i grupit parlamentar të kësaj partie, Erjon Braçe.

Sipas Braces, heshtja bashkë me skandalet, dëshmojnë se ligji në këtë vend nuk zbatohet. “Dëshmojnë se ligji merr gjatë zbatimit trajtën e plastelinës politike, se ligji është kapur nga krimi, se ligji po përdoret për nevoja të familjes biologjike e politike të Sali Berishës”.
Sipas PS, kryeministri gënjeu dhe për premtimin më të madh që u bëri shqiptarëve, atë ku “Institucionet shtetërore do të jenë të parat që do të respektojnë detyrimet ligjore”.

Por sic theksoi nënkryetari i grupit parlamentar të PS, në Shqipëri bëhet gjithmonë e kundërta. “Natyrisht, që po bëhet e kundërta mes dy qytetarësh të barabartë në kushtetutë rekrutohet në punët më të rëndësishme, ai politiku, ai i familjes, mes të ndershmit dhe trafikantit, imuniteti i jepet trafikantit. Mes kultivuesve të marjuanës, ligji bie vetëm mbi plakat 80-vjeçare të Vlorës. Tezes 80-vjeçare të Delvinës, si tregues i luftës ndaj trafikut, jo mbi kryeagronomin me nam të Lazaratit. Mes dy qytetarëve që duan të shijojnë detin dhe bregun, skafi i lejohet ministrit dhe pse në shkelje të ligjit. Mes binzesit të ndershëm dhe klientit të korruptuar, partner i shtetit bëhet klienti i korruptuar. Mes dy të thirrurave nga Prokuroria, e refuzon atë ai që ka fuqinë e mbrojtjes së Sali Berishës”.
Sipas Braces skandalet më të fundit të shtetit shqiptar i dëshmoi edhe arrestimi i bujshëm me drogë i shoferit të Ambasadës shqiptare ne Itali.

Deklarata e Braçes ka shkaktuar reagimin e menjëhershëm të Partisë Demokratike. Nëpërmjet zëdhënësit Bogdani selia blu akuzoi Braçen se ka lidhje me Enver Dondollakun.
Ndërkohë nënkryetari i grupit kuvendor socialistë Braçe pas kësaj deklarate të Bogdanit nëpërmjet një njoftimi për shtyp bëri të ditur se do të depozitojë kallëzim penal për zëdhënësin e Partisë Demokratike. Brace tha se do ti kërkojë Prokurores së Përgjithshme Ina Rama që të verifikojë shpifjet drejtuar tij nga Bogdani, ndërsa bëri të ditur se prej tre vjetësh e gjysëm vijon të presë në Gjykatën e Lartë kryeministrin Berisha të cilin në atë kohë Braçe e denoncoi për shpifje.
(d.b/a.s/Balkanweb)