TIRANE-  Qeveria shqiptare e konsideron dukshëm kategorinë e ish-pronarëve si një grup social, që "i ka zënë derën". Sado e çuditshme të duket kjo për një qeveri të djathtë, shpenzimet që janë parashikuar për të korrigjuar atë, që ministrat dhe kryeministri Sali Berisha vazhdojnë ta quajnë gjithnjë si "padrejtësia fatale e regjimit komunist", konfiskimin e pronave të patundshme, jo vetëm që janë të papërfillshme, por madje, kanë ardhur në rënie. Në Programin qeveritar është premtuar se maxhoranca e re angazhohej për një kthim dhe kompensim të pronave në kufijtë maksimalë të mundur. Për këtë qëllim, do të amendohet ligji aktual, duke eliminuar kufizimet diskriminuese të tij. Pronat do të kthehen fizikisht kudo ku është e mundur dhe në çdo rast tjetër, ato do të kompensohen në natyrë me troje turistike apo në vlerën e tregut.
Le të shohim tabelat e Buxhetit të vitit 2008. Madje, edhe të korrigjuara me Buxhetin Suplementar. Ky i fundit nuk shtoi as një qindarkë në favor të të shpronësuarve nga diktatura, duke lënë në fuqi një fond vjetor në masën 500 milionë lekë të reja. Rreth 4.1 milionë euro, sipas kursit të shkëmbimit valutor të këtyre ditëve. Shpenzimet totale, të parashikuara nga ky buxhet vjetor, janë 360 miliardë e 207 milionë lekë të reja. Shifër e lavdërueshme, e paarritur nga asnjë qeveri tjetër më parë, që dëshmon për zhvillimin ekonomik të pandalshëm të vendit, pavarësisht nga drejtimi politik i tij. Në krahasim me këtë shifër gjigande, fondi për të kompensuar ish-pronarët përbën vetëm 0.14 për qind të shpenzimeve të përgjithshme buxhetore. Ky raport është më i ulët se një vit më parë. Në Buxhetin e Shtetit për vitin 2007 ishin caktuar, përsëri 500 milionë lekë të reja për shpërblimin e ish-pronarëve, por duke qenë se shpenzimet ishin më të vogla nominalisht (285 miliardë e 329 milionë lekë të reja), fondi i planifikuar për ta përbënte 0.18 për qind të shpenzimeve totale. Shifër vërtet qesharake, më pak se 0.2% të shpenzimeve buxhetore, por edhe më e çuditshme është caktimi i një fondi më të ulët në raport me këto shpenzime. Madje, kjo është më e ulët se në vitin 2006, kur ndonëse ishin caktuar vetëm 300 milionë lekë fond, ato përbënin 0.15% të shpenzimeve totale.

(s.g/GazetaShqiptare/Balkanweb)