Plot 204 rrugë në qytetin e Elbasanit priten të marrin emërtimin në fund të muajit shtator. Kështu ka konfirmuar kreu i bashkisë në një takim me zv/ministrin e Brendshëm Ferdinant Poni. 

ELBASAN - Në fund të muajit shtator në Bashkinë e Elbasanit pritet të përfundojë emërtimi i 204 rrugëve si dhe do të jetë gati sistemi i ri i adresave. Në një takim mes kreut të Bashkisë së Elbasanit Qazim Sejdini dhe zv/ministrit të Brendshëm Ferdinant Poni  u konfirmua se nga 15 shtatori  i vitit në vazhdim edhe në Bashkinë e Elbasanit do të fillojë printimi elektronik dhe shpërndarja e certifikatave.
Gjithashtu Poni shtoi se në fund të muajit shtator bashkitë në të gjithë vendin duhet të kenë siguruar ambientet për gjendjet civile pasi pas pak muajsh në to do të fillojë shpërndarja e kartave të identitetit dhe pasaportave biometrike. Ndërkaq kreu i Bashkisë së Elbasanit ka garantuar qeverinë nga ana e tij se në këtë njësi të pushtetit vendor i gjithë ky proces do të realizohet me sukses të plotë. Në mbledhjen e fundit, këshilli i kësaj bashkie pritet të miratojë emërtimin e 204 rrugëve ndërsa është pothuajse gati një godinë tepër moderne në qendër të këtij qyteti ku edhe do të përqendrohet shërbimi i ri.
(a.s/News24/Balkanweb)