STRASBURG- Parlamenti Europian pritet të zhvillojë një seancë të posaçme për gjendjen në të cilën jeton minoriteti grek në Shqipëri. Shkak është bërë një kërkesë e eurodeputetit grek, Jorgos Gjeorgjiu, i cili pretendon se Shqipëria zbaton praktika raciste ndaj pakicave kombëtare që jetojnë në vendin tonë. Gjeorgjiu i referohet çështjes së 10 minoritarëve grekë, të vënë nën akuzë nga prokuroria shqiptare për thirrje antishqiptare dhe protesta antikushtetuese për “autonominë e Vorio-Epirit”. Sipas tij, shteti shqiptar synon t’u privojë lirinë këtyre personave për shkak se ata janë grekë. “Dhjetë grekë minoritarë të Vorio Epirit ndodhen të akuzuar nga organet shqiptare për një protestë që ndodhi në 10 prill të 2008, jashtë ndërtesës së rajonit policor të Himarës. Shkak për protestën (e cila ishte paqësorë nga ana e turmës, por u shoqërua me breshëri armësh në ajër por dhe kërcënime nga “organet e rendit”) ishte rrahja dhe mbajtja në qeli e padrejtë e dy të rinjve minoritarë, nga ana e organeve policore shqiptare të zonës, sepse ata folën greqisht para tyre”, - shprehet Gjeorgjiu në kërkesën e tij. Në vijim të të njëjtit argument, ai vë në dukje se “Shqipëria, vendi që dëshiron të integrohet në BE dhe është tashmë anëtare e NATO-s, tregon edhe njëherë se mban qëndrim autarkik ndaj minoriteteve që jetojnë në territorin e saj, duke shkelur të drejtat themelore njerëzore si ato të lirisë së fjalës, të vetëpërcaktimit dhe të së drejtës së pronës”. Ndaj për këtë arsye, ai kërkon nga Parlamenti Europian, se “për çfarë arsye nuk merren masa konkrete dhe rezultative ndaj këtij vendi dhe lejon në Shqipëri keqësimin kohë pas kohe, duke zbatuar praktika raciste ndaj pakicave kombëtare që jetojnë atje?”, - përfundon kërkesa e tij.
Protesta
Prokuroria e Vlorës ka marrë të pandehur dhjetë minoritarë grekë të akuzuar për thirrje antishqiptare dhe protesta antikushtetuese për “autonominë e Vorio-Epirit”. Ata akuzohen për veprën penale të “pjesëmarrjes në miting të paligjshëm”, e cila parashikohet nga neni 262 i Kodit Penal. Sipas kësaj dispozite, ata rrezikojnë dënimin me gjobë ose me burgim nga tre muaj deri në dy vjet. Ndërkaq, referuar fletë-thirrjes së prokurorisë dërguar Andrea Belerit, thuhet se “nga hetimet e deritanishme ka rezultuar se shtetasi Andrea Beleri në bashkëpunim me 60-70 persona, në mbrëmjen e datës 10.04.2008 merrte pjesë në një grumbullim të paligjshëm para stacionit të policisë në Himarë, ku janë hedhur dhe thirrje si: “Të largohet policia nga Himara”, “Duam polici greke”, etj”. Sipas organit të akuzës, “me gjithë thirrjet për t’u larguar nga vendi i tubimit dhe shpërndarë nga ana e policisë, ai nuk i është përgjigjur këtyre thirrjeve”. Emrat e dhjetë minoritarëve grekë të marrë në cilësinë e të pandehurit nga prokuroria e Vlorës, nuk bëhen të ditur, ndërkohë që GSH ka siguruar fletë-thirrjen e vetëm njërit prej tyre, Andrea Belerit.

(s.g/GazetaShqiptare/Balkanweb)