TIRANE- Projekti i Partisë Demokratike për të shkrirë aleatët e vegjël brenda saj, po merr formë. Partia Reformatore e Re, është pjesa e parë e planit të kryeministrit Berisha, jo vetëm për të zgjeruar PD-në, por edhe për të zvogëluar numrin e aleatëve. Ende nuk dihet nëse në planin e kryeministrit, njëkohësisht dhe të kryetarit të PD-së, janë partitë e tjera të vogla si PAA-ja e Xhuvelit, PBLD-ja e Starovës, që ka qenë pjesë e PD-së, si dhe PAD-ja e Cekës, që ka qenë një nga anëtarët e parë të partisë së parë opozitare krijuar në vend pas 1991-it. Këtij të fundit pritet t'i ofrohet një bashkëpunim i ngushtë me PD-në në sezonin e ardhshëm parlamentar dhe deri më tani është i vlefshëm ofrimi i postit të nënkryetarit të Parlamentit, mbetur vakant pas largimit të Bejës drejt Ministrisë së Arsimit. Ndërsa në shtator, pritet të fillojë procesi i shkrirjes së PDR-së me negociata mes palëve. Këtë fakt e pranoi dhe vetë Jemin Gjana, një nga funksionarët por edhe deputetët më të vjetër të PD-së. Ai thekson se kjo shkrirje e PDR-së do të realizohet, por nga ana tjetër thekson se nuk i ka kuptuar asnjëherë largimet nga PD-ja. "Ajo që mund të them me siguri, si njeri që nuk është larguar kurrë nga strukturat e PD-së, është se edhe largimet nuk kanë qenë të motivuara, bashkimet mund të jenë të motivuara. Nuk kam gjetur asnjë motiv për largimet që janë bërë", - u shpreh Gjana. Me këtë deklaratë të tij, Gjana zbardh një pjesë të planit të Berishës, që gjithmonë me afrimin e fushatave elektorale, kryesisht për zgjedhjet e përgjithshme, u ka ofruar të larguarve të PD-së një afrim me të. Po një pjesë e këtij plani të Berishës ka qenë thjeshtë demagogji, pasi asnjëherë nuk u është bërë ftesë konkrete të larguarve nga PD-ja. Pollo është i detyruar ta pranojë ofertën, për shkak se partia e tij ka vetëm dy deputetë dhe këta të dhuruar nga PD-ja, dhe se PDR-ja nuk ka asnjë impakt në elektoratin shqiptar. Në një intervistë të tij, Pollo nuk ka dashur të shprehet me pika konkrete për planin e shkrirjes, por ka lënë të kuptohet se në shkëmbim të realizimit të planit, ai do të marrë edhe në 2009-ën një vend në Parlamentin shqiptar së bashku me Tritan Shehun. PDr-ja, aktualisht në qeverisje mban postin më të lartë se asnjë parti tjetër e koalicionit, atë të zëvendëskryeministrit. Por një post të tillë, partia fituese asnjëherë nuk ia lë një partie aleate, prandaj dhe Berisha ka zgjedhur Pollon si zëvendëskryeministër, duke e konsideruar pjesë të PD-së dhe jo të PDR-së.

(s.g/GazetaShqiptare/Balkanweb)