TIRANE- Kreu i PS, Edi Rama kërkoi sot nga kryeministri Berisha të ndalohet dhuna ndaj mediave përmes gjobave arbitrare të shumicës politike të KKRT që përfaqëson qeverinë në atë institucion. Rama gjithashtu akuzoi Berishën se po bën fushatë elektorale të paligjshme. “Dua t'i bëj sot apel kryeministrit Berisha për të mos e provokuar më tej opozitën duke përdorur lekët e shqiptarëve për një fushatë elektorale të paligjshme”.
Rama i bëri sot kryeministrit Berisha 4 kërkesa konkrete:
1. Të ndalohen njësoj me ligj, për të gjitha subjektet politike, ose të lejohen njësoj me ligj, për të gjitha subjektet politike, spotet televizive jashtë periudhës elektorale të përcaktuar nga ligji.

2. Të mos ketë asnjë kufizim ligjor për spotet sensibilizuese të subjekteve të shoqërisë civile për problemet e vendit e të qeverisjes së tij në nivel qëndror e vendor.

3. Të përcaktohet qartë me ligj llojin dhe kohëzgjatjen e njoftimeve të qeverisë apo institucioneve shtetërore përmes spoteve televizive.

4. Të ndalohet dhuna ndaj mediave përmes gjobave arbitrare të shumicës politike të KKRT që përfaqëson qeverinë në atë institucion.

Lidhur me gjobën e vënë ndaj TV NEWS24 vetëm sepse transmetoi një spot kritik ndaj kryemisnitrit të porositur nga një OJF, Rama tha se kryemisnitri “të mos bëjë as shurdhin e as budallain në lidhje me faktin se KKRT-ja, përmes kryetares së zgjedhur prej qeverisë, ka gjobitur në mënyrë të paligjshme televizionet që kanë transmetuar një reagim të ligjshëm të qytetarëve të këtij vendi ndaj spotit të kryeministrit.”

(s.g/BalkanWeb)