TIRANE- Deri në fund të muajit nëntor qeveria ka planifikuar që të mbyllë procesin e privatizimit të shoqërisë së sigurimeve INSIG. Zëvendësministri i Financave, Sherefedin Shehu, u shpreh dje për ATSH-në se më 10 shtator do të hapen ofertat e kompanive që kanë shprehur interes për privatizimin e 61% të aksioneve shtetërore të kompanisë. Shehu tha se kompania audituese KPMG po kryen procesin e vlerësimit të aseteve të kompanisë INSIG. Ai shtoi se Këshilli i Ministrave, në bazë të çmimit të dalë nga vlerësimi, do të përcaktojë nivelin minimal dhe maksimal, që do të shërbejnë si bazë për hapjen e tenderit për privatizimin e kësaj kompanie.

(s.g/Balkanweb)