TIRANE-  I sh-ministri ynë i Jashtëm, Kastriot Islami do të jetë reporteri i Këshillit të Europës në një ndër zonat më të nxehta të diplomacisë ndërkombëtare, siç është momentalisht Gjeorgjia. Islami bashkë me një diplomat hungarez, Mátyás Eörsi ndodhen tashmë në Tbilis për të mbledhur informacion dhe të diskutojnë në lidhje me situatën e rënduar pas ndërhyrjes së forcave ushtarake ruse në rajonin e Osetisë së Jugut. Këshilli i Europës, nëpërmjet një deklarate për shtyp sqaroi dje se gjatë vizitës së tyre treditore në Gjeorgji, Islami dhe Eörsi do të zhvillojnë takime me Presidentin Shakashvili, kryetarin e Parlamentit gjeorgjian, ministrin e Punëve të Jashtme, të Mbrojtjes dhe atë të Brendshëm. Ndërkaq, vetëm pak minuta përpara nisjes, Islami tha për televizionin "Neës 24", se do të tentohet ndërmjetësimi mes palëve për të ndalur dhunën në rrugë. Situata në Gjeorgji sipas ish-kryediplomatit shqiptar, po përdoret nga autoritetet ruse për të ndikuar negativisht edhe në statusin e Kosovës. Ky fakt, sipas Islamit, u pa qartë edhe në takimin e zhvilluar ditë më parë në Gjermani. Sipas zotit Islami, gjendja në Gjeorgji është shumë shqetësuese dhe palët duhet të gjejnë gjuhën e përbashkët për të ndalur këtë konflikt të armatosur, i cili mund të ketë pasoja shumë të rënda. Ish-ministri i Jashtëm është shprehur se veprimet e ndërmarra nga Kremlini, duke dërguar trupat e saj në kufirin me Gjeorgjinë dhe sulmimi i saj me artileri të rëndë, është i nxituar dhe mund të ndikojë në destabilizimin e situatës, jo vetëm midis dy vendeve, por në të gjithë rajonin. Islami shton se tradicionalisht, marrëdhëniet midis dy vendeve në konflikt nuk kanë qenë të mira, që kur Gjeorgjia u shkëput nga ish- Bashkimit Sovjetik. Në lidhje me deklaratat e presidentit amerikan, Xhorxh Bush, se Shtetet e Bashkuara mbështesin popullin e Osetisë, sipas Islamit kjo deklaratë e Bushit nënkupton që Amerika është kundër ndërhyrjes së Rusisë. Nga bombardimet mbi Osetinë, numri i të vrarëve ka arritur në mbi 1 mijë dhe mijëra të tjerë të plagosur. Kryeministri rus, Vladimir Putin, deklaroi pak ditë më parë në Vladikavkaz, se konflikti i armatosur në rajonin separatist të Osetisë së Jugut kishte shkaktuar dhjetëra të vdekur dhe qindra të plagosur. Abkhazia dhe Osetia Jugore shpallën pavarësinë de fakto nga Gjeorgjia në fillimin e viteve '90. Presidenti i Gjeorgjisë, Mikhail Saakashvili ka premtuar vazhdimisht të kthejë rajonet nën kontrollin e qeverisë qendrore, përmes një zgjidhjeje paqësore të konfliktit. Prej 6-muajsh, Shqipëria ka reporterin e saj në Këshillin e Europës lidhur me ngjarje të ndryshme dhe debate të nxehta të politikës ndërkombëtare. Konflikti në Gjeorgji e ka detyruar Këshillin e Europës të çojë të dërguarit e posaçëm, të cilët veç raportit nga terreni, kanë mision edhe uljen e gjakrave mes Presidentit dhe opozites, pas akuzave që kjo e fundit i ka bërë kreut të shtetit për korrupsion dhe keqmenaxhim të ekonomisë së vendit.

(s.g/GazetaShqiptare/Balkanweb)