TIRANE- Lëvizja Socialiste për Integrim paralajmëron jo pak surpriza për zgjedhjet parlamentare të 2009-s. Bashkëpunimi me ish- kryeministrin Fatos Nano, demokristianët e Nard Ndokës dhe Partinë Bashkimi për të Drejtat e Njeriut, janë tri objektivat e saj më të afërta, nga ku besohet të vijë dhe fitorja në zgjedhje. Numri dy i LSI-së, Pëllumb Xhufi, në një prononcim të djeshëm për mediat e konsideroi më të mundshme se kurrë arritjen e kësaj aleance. "Nuk kemi ndonjë kontakt me këto dy parti; natyrisht, një koalicion me to do të kërkonte të tjera gjëra, ky nuk është një koalicion pragmatik, por bashkëpunimi mund të zgjerohet edhe me forca të djathta, pse jo, edhe luftën me referendumin ne e kemi pasur me shumë kënaqësi edhe me përfaqësues të së djathtës", - vuri në dukje Xhufi, për të theksuar mandej se "koalicioni 'E Majta për Integrim', është i hapur. Nuk mund të themi sot se kush mund të bëjë pjesë në të, pasi nesër mund të hyjnë 5 parti të tjera", saktësoi ai. I pyetur sakaq për deputetin e Sarandës, Fatos Nanon, Xhufi kujton ofertën e pak muajve më parë, kur LSI-ja kërkoi të dialogonte me të kundër ndryshimeve kushtetuese të miratuara me konsensus PD-PS. "Zoti Nano sigurisht ka partinë e tij, ka opsionet e tij, të cilat mendoj që nuk gërshetohen për një ndërmarrje të tillë. Sigurisht, ne me zotin Nano dhe me këdo, kemi dëshiruar dhe do të dëshironim që të bashkëpunonim për çështje të tilla madhore, siç ishte rasti i ndryshimeve kushtetuese", - nënvizoi ai. Xhufi sakaq la të hapur një tjetër mundësi, që është dalja e vetme e LSI-së në zgjedhjet e 2009-ës. "Çdo forcë politike ka edhe të drejtën e zotit që të garojë e vetme, si mund të imponosh 'ti' që 'unë', për të garuar në garën elektorale duhet të futem patjetër në një koalicion?", - theksoi ai. Ndërkaq, LSI-ja mbetet statike vetëm në pozicionin për të mos u bërë pjesë e koalicionit të përbërë, të propozuar nga PS-ja, koalicion të cilin, Xhufi me ironi e quajti "të barabartë me tufëzimin blegtoral që u bë në periudhën e diktaturës". Kësisoj, mes gjithë alternativave për bashkëpunim që dalin përpara LSI-së, kjo sipas Xhufit është totalisht e përjashtuar. Përndryshe, sikundër theksoi, "nëse kjo do të bëhej nesër, do të thoshin troç të gjithë që të vëmë LSI-në në poltronin e ekzekutimit, do ta pushkatojmë".

(s.g/GazetaShqiptare/Balkanweb)