TIRANË – LSI ka reaguar sot në lidhje me ligjin për prokurorinë. Konkretisht anëtari i Kryesisë së LSI, Spartak Braho tha se ndonëse pretendohet nga mazhoranca se po vazhdon reformimin e organeve të drejtësisë, duke e konsideruar sukses miratimin konsensual PD-PS të ligjit për pushtetin gjyqësor para do kohësh, në fakt ajo që u sanksionua nga miratimi i këtij ligji është vetëm shkelje e pavarësisë dhe uzurpim nga ekzekutivi i pushtetit gjyqësor.

“Nuk kanë kaluar shumë kohë nga uzurpimi dhe presioni i ushtruar ndaj gjyqësorit po jep pasojat e saj. Largimi dhe dorëheqja e disa gjyqtarëve këto ditë, në shenjë proteste e dëshmon më së miri këtë fakt”, tha Braho duke shtuar se tani po synohet goditja dhe uzurpimi po me ligj i organit të Prokurorisë. Në këtë mënyrë Lëvizja Socialiste për Integrim tërheq vëmendjen dhe denoncon këto synime dhe tentativa të mazhorancës duke theksuar  se vendit I duhet një prokurori e fortë, e pavarur tërësisht, me integritet dhe efikasitet në luftën kundër krimit.

Duke shprehur qëndrimet e saj për ligjin e Prokurorisë, LSI shprehet se “nuk mund të pranohet ideja dhe synimi i Ministrisë së Drejtësisë për të futur në ligj konceptin e pezullimit të Prokurorit të Përgjithshëm. Këtë çështje e ka zgjidhur Kushtetuta dhe vetë Gjykata Kushtetuese me vendimet e saj. Nuk mund të pranohet ideja dhe synimi i Ministrisë së Drejtësisë për të rritur ndikimin direkt të saj, në strukturën e Këshillit të Prokurorisë, si dhe të eliminohet prezenca aktive e përfaqësuesit të Presidentit. Nuk mund të pranohet synimi për ta lënë pa sqaruar, pra të paligjëruar dhe sanksionuar në ligj statusin e Prokurorit të Përgjithshëm pas mbarimit të mandatit të tij, si edhe tentativa për të ulur pagën dhe shpërblimin e prokurorëve nën nivelin aktual.
Nuk mund të pranohet pezullimi i prokurorëve të thjeshtë nga detyra për shkak të akuzave të pabazuara apo presione që vijnë për shkak të funksioneve dhe veprimtarisë së tyre në detyrë. Mbrojtja e tyre që trajtohet padrejtësisht si “çështje imuniteti” garantohet vetëm nga Prokurori i Përgjithshëm.
Nuk mund të pranohet ndërhyrja në ligj me synimin e shmangies nga drejtimi direkt i organit të Prokurorisë, të Policisë Gjyqësore në procesin e hetimit.
Eshtë i papranueshëm, madje shkelje e rëndë e ligjit kalimi i tyre në varësi të Ministrisë së Brendshme për funksionet hetimore.
Prokuroria e Përgjithshme duhet të anullojë urdhrin e përbashkët me Ministrin e Brendshëm për këtë çështje, pra për kalimin e Policisë Gjyqësore në varësi të Ministrisë së Brendshme, si të pabazuar në ligj.
Nuk mund të lejohen lëvizjet dhe emërimet, transferimet dhe ngritja në detyrë e prokurorëve pa marrë më parë pëlqimin e tyre.
Nuk mund të lejohet më ky regjim sigurimi dhe ruajtje të jeës së prokurorëve, ndaj është e domosdoshme që pranë organit të prokurorisë të ngrihet dhe të funksionojë në varësi të saj një trup e posaçme policore.
Nuk mund të lejohet që pavarësia financiare e Prokurorisë të jetë e kufizuar plotësisht nga Ministria e Financave. Kërkesat për burimet dhe mbështjetjet financiare të këtij organi duhet të kenë prioritet nga ekzekutivi dhe vetëm Kuvendi i Shqipërisë mund të vendosë për to”, përfundon Braho.

Të gjitha këto çështje dhe të tjera që lidhen me statusin e prokurorëve, ekspertët e LSI-së kanë paraqitur projekt-draftin përkatës, i cili sot iu dërgua Presidencës, Prokurorisë së Përgjithshme, Ministrisë së Drejtësisë, Kuvendit të Shqipërisë, Shoqatës së Prokurorëve, EURALIUS-it, Ambasadës të SHBA-së, etj.
(a.s/Balkanweb)