TIRANE-  Qeveria akordoi 1790 bursa për vitin akademik 2008-2009, nga të cilat 1600 do të jenë për studentët dhe 190 për nxënësit e shkollave. Kriteret për të përfituar këto bursa është që në të ardhurat familjare, kufiri minimal të jetë 2600 lekë për frymë dhe ai maksimal 4600 lekë për frymë. Përfitojnë bursa dhe fëmijët e punonjësve të policisë që kanë humbur jetën në krye dhe për shkak të detyrës, kjo kategori hyn në ato që përfitojnë jashtë kriterit ekonomik. Ndërsa sipas kriterit ekonomik, përfitojnë nxënësit dhe studentët që vazhdojnë studimet 5 kilometra larg vendbanimit të tyre; nxënësit që banojnë në fshat pa shkollë 9-vjeçare; nxënësi/studenti që kanë fituar statusin e jetimit; ata që kanë humbur kujdestarinë prindërore; studentët bashkëshortë që vendoset në konvikt; fëmija, nxënës apo student që ka fituar statusin e invalidit. Sipas rezultateve, përfitojnë të gjithë ata nxënës dhe studentë që kanë mbaruar vitin pararendës me të gjitha 10-ta; që kanë mbaruar shkollën e mesme me medalje ari; 30 studentët që dolën me rezultate të mira në provimin e maturës shtetërore; studentët që kanë mbaruar vitin akademik me të gjitha 10-ta; studentët që kanë përfunduar me mesatare mbi 8 në degët matematikë, fizikë. Të gjithë ata studentë dhe nxënës që kanë të ardhura familjare mbi shifrën 4600 lekë për frymë dhe nuk kanë specifikat e mësipërme nuk do të kenë mundësi përfitimi të bursës. Ka një shënim specifik të Ministrisë së Arsimit: "Nxënësit dhe studentët nga fshati përfitojnë bursë, kur familja përfiton ndihmë ekonomike, në varësi të masës së kësaj ndihme, brenda planit të akorduar për secilën njësi të pushtetit vendor". Bursat për shkollën e mesme janë parashikuar të jepen për nxënësit e viteve të dyta, pasi në këtë vit akademik, për shkak të kalimit të sistemit shkollor nga 8 në 9-vjeçar, nuk do të ketë vit të pare. Gjithashtu, këtë bursë do ta përfitojnë nxënësit e shkollave të profilizuara si veterinari, bujqësi, ndërtim dhe pyjore. Në bazë të pasqyrës së publikuar, bursat e plota për shkollat nëntëvjeçare dhe ato të mesme variojnë nga 6000-6500 lekë dhe sipas Ministrisë së Arsimit, ka një rritje prej 20 për qind nga vlera e vjetshme e bursës. Kjo është bërë për shkak të rritjes së çmimeve. Ndërsa kuota ditore për nxënësit e këtyre shkollave ka qenë 164 lekë dhe është bërë 193.8 lekë. Ka shtesë prej 500 lekësh bursa për studentët e shkollave të larta. Nga 8000-8500 lekë, ajo bëhet për këtë vit akademik 8500-9000 dhe sipas Ministrisë kjo bëhet për shkak se 500 lekë do t'i kalojnë si rritje e tarifës së akomodimit në Sha "Trajtimi i Studentëve", në Qytetin e Studentëve. Të gjitha të dhënat për bursat që përfitojnë, për gjysmë bursat dhe për pagesat pasqyrohen në dy pasqyrat e publikuara.

(s.g/GazetaShqiptare/Balkanweb)