TIRANE- Nuk kam pasur asnjë ftesë apo shkresë për të dëshmuar në gjyq kundër Lefter Cenajt si dhe nuk kam qenë administrator i firmës së tij”. Kjo ishte deklarata e djeshme e bërë nga deputeti Arben Malaj, i cili u akuzua dje nga avokati i shtetit, Eduard Halimi për pengim të procesit të zbardhjes së të vërtetës së firmës piramidale “Cenaj” si dhe pengim të marrjes së shumës së kreditorëve të kësaj firme, që vite më pare u depozituan në bankat greke. Arben Malaj në një deklaratë për “Shqiptaren”, i përgjigjet menjëherë avokatit të shtetit, duke e konsideruar këtë të fundit një avokat politik të PD-së, i cili vetëm mashtron opinionin publik. Deputeti i Partisë Socialiste u shpreh shkurt dje lidhur me pretendimet e Eduard Halimit për çështjen “Cenaj”, duke i përmbledhur në katër pika. “Kompania piramidale “Cenaj” është vënë nën kontroll nga shteti kur unë kam qenë ministër i Financave, e dyta; ka qenë qeveria e Partisë Socialiste që ka kërkuar ekstradimin e Lefter Cenajt nga Greqia dhe jo qeveria e Partisë Demokratike”, - tha dje Malaj. Me dy deklaratat e para, Malaj përpiqet të sqarojë situatën lidhur me zhurmën që po bëhet jo vetëm për kompaninë piramidale të “Cenajt”, por edhe me ekstradimin e tij nga Greqia, ekstradim i cili po konsiderohet si sukses i qeverisjes aktuale. Më pas ai bën deklaratën tjetër, se “nuk kam qenë administrator i firmës ‘Cenaj’”. Për këtë pikë ai është akuzuar disa herë nga vetë Berisha, si kryetar i opozitës për lidhjet e tij me këtë firmë, pasiqë ka administruar të gjithë paratë e kreditorëve. Ndërsa për deklaratën e Eduard Halimit se Malaj nuk është paraqitur në gjykatat greke pas shumë kërkesave për të dëshmuar në procesin e Lefter Cenajt, ish-ministri përgjigjet, se “s’kam pasur asnjë ftesë apo shkresë që unë si ministër i Financave të dëshmoja në këtë proces”. Nga ana tjetër, Halimi pretendon se gjykatat greke i kanë shtyrë disa here seancat gjyqësore për shkak të mos paraqitjes së Malajt në gjykatë. Madje, ai dje la të kuptohej se ka qenë Malaj, si ministër i Financave, që nuk ka lejuar të paraqiten në të njëjtat gjykata për të njëjtën arsye dhe Fahrudin Arapin, kryeadministratori i këtyre firmave, i cili ishte në varësi të ministrit. Pavarësisht akuzave politike që i janë bërë Malajt nga ana e Partisë Demokratike për faktin se ai ka qenë drejtues i njërës prej firmave kryesore me qendër në Vlorë, ai nuk e ka pranuar asnjëherë këtë fakt, të cilin e përsërit sërish, pra që nuk ka qenë administrator i një firme piramidale.
Ekstradimi i Cenajt ka rikthyer edhe njëherë debatin mes së majtës dhe të djathtës për çështjen e firmave piramidale. Ky debat përbëhet nga akuza dhe kundër akuza, pasi secila prej tyre përpiqet të largojë nga vetja përgjegjësinë për këtë periudhë të vështirë të historisë së Shqipërisë, siç ishin vitet 1995-1997, të cilat kulmuan me një luftë mes shqiptarëve. Berisha si president, pavarësisht paralajmërimit, nuk ka bërë asgjë për ndalimin e këtyre firmave, madje disa prej tyre kanë financuar fushatën elektorale të tij të zgjedhjeve të 1996. Shumë kohë pas ngjarjeve të 1997 ai i ka kërkuar falje qytetarëve shqiptarë që nuk arriti t’i bllokonte këto firma. Por nga ana tjetër, socialistët në opozitë e ngritën shumë vonë zërin e tyre të protestës kundër këtyre firmave, madje kjo ndodhi vetëm kur humbën zgjedhjet e 1996. Kur erdhën në pushtet, socialistët organizuan një proces të gjatë dhe të vështirë për administrimin dhe kthimin e parave të kreditorëve. Ky proces u shoqërua me akuza nga ana e PD-së, e cila akuzonte drejtuesit socialistë se po i blinin asetet e firmave me vlera qesharake duke i kthyer vetëm një pjesë shumë të vogël qytetarëve shqiptarë.

(s.g/GazetaShqiptare/Balkanweb)