BRUKSEL-  Sot Shqipëria është ftuar në mbledhjen e jashtëzakonshme të anëtarëve të NATO-së, mbledhje e cila zhvillohet në Bruksel. Kjo është mbledhja e radhës e ministrave të Jashtëm dhe Basha do të renditet në tryezë, ashtu si gjithë homologët e tjerë të kësaj aleance. Me të njëjtin status do të ulet dhe ministri i Jashtëm kroat, atdheu i të cilit mori ftesën për t'u anëtarësuar në NATO në prill të këtij viti, njëkohësisht me vendin tone. Ky është takimi i parë i Këshillit të Atlantikut të Veriut në nivel ministrash të Jashtëm, në të cilin ftohen të marrin pjesë Shqipëria dhe Kroacia. Në qendër të këtij takimi të jashtëzakonshëm të ministrave të Jashtëm të NATO-s do të jenë situata dhe zhvillimet në Gjeorgji si dhe marrja e vendimeve përkatëse. SHBA-ja, në prill të këtij viti kërkoi me ngul që edhe Gjeorgjia të marrë statusin e kandidatit për anëtar në NATO, por ishte Rusia, me anë të presidentit të atëhershëm, Vladimir Putin që vendosi veton kundër kësaj kërkese. Tashmë ministrat e Jashtëm të NATO-s do të shohin mundësinë për të ndihmuar Gjeorgjinë për të përballuar situatën, dhe madje pritet të diskutohet që në vitin e ardhshëm ky shtet i Europës Lindore së bashku me Maqedoninë të marrë statusin e kandidatit për anëtarë. Ndërkohë që Shqipëria dhe Kroacia u ftuan të anëtarësohen në NATO në samitin e Bukureshtit, në 3 prill 2008. Më 9 korrik 2008 vendet anëtare të NATO-s nënshkruan protokollet e anëtarësimit të Shqipërisë dhe Kroacisë, të cilët i hapën rrugë anëtarësimit të plotë të vendit tonë dhe Kroacisë në Aleancën e Atlantikut të Veriut.

(s.g/GazetaShqiptare/Balkanweb)