Kanë përfunduar negociatat mes konsorciumit amerikano-zviceran, që paraqiti ofertën më të leverdishme për blerjen e 85% të aksioneve të kompanisë shtetërore të përpunimit të naftës ARMO, dhe Ministrisë së Ekonomisë, Tregtisë dhe Energjetikës. Këtë informacion e jep për "Gazetën Shqiptare" numri dy i këtij dikasteri, Neritan Alibali. Sipas zëvendësministrit, që ka drejtuar Komisionin e Vlerësimit të Ofertave dhe grupin e përfaqësimit të Ministrisë në negociatat për kontratën, i gjithë procesi negociues ka mbaruar që ditën e premte të javës së kaluar, pra brenda afateve, të parashikuara nga Vendimi i posaçëm i Këshillit të Ministrave i 3 shkurtit 2008 për privatizimin e ARMO-s.
Ndërkohë, sipas Alibalit, tashmë konsorciumi blerës ka paguar edhe 30 për qind të shumës së ofertës së bërë për blerjen e paketës së sipërpërmendur aksionare, çka tejkalon edhe afatet e kushtet e parashikuara në ligje e VKM për detyrimet e subjektit, që shpallet zyrtarisht fitues.
Konsorciumi
Kompania amerikane "Raffinery Associated of Texas", në konsorcium me "Mercuria Energy Group" dhe "Anika Enterprises", u shpallën në qershor të këtij viti fitues të tenderit për privatizimin e ARMO-s. Nga tri kompanitë e kualifikuara, amerikano-zviceranët arritën nivelin më të lartë të vlerësimit, me një total prej 93.14 pikësh, ku përfshihej vlerësimi i ofertës për blerjen e aksioneve dhe asaj për përmirësimin e teknologjisë.
Konsorciumi ofroi 128.7 milionë euro për blerjen e aksioneve në shitje të ARMO-s, ndërkohë që 240 milionë euro të tjera do të përdoren për përditësimin teknologjik. Në fakt, kjo do të thotë rinovim i plotë i teknologjisë së uzinës së përpunimit të thellë të Ballshit, që është ndërtuar më se 30 vjet më parë, totalisht e amortizuar në ditët tona. Ky objekt nuk është në gjendje aktualisht, të prodhojë gazoilin e cilësisë së lartë, sipas standardeve europiane (D1) dhe prodhimi kufizohet vetëm në naftën për traktorë e automjete të rënda, që ndotin së tepërmi mjedisin e dëmtojnë makineritë që e përdorin.
Angazhimet
Një ditë pas shpalljes së vlerësimit të ofertave për privatizimin e 85% të aksioneve të shoqërisë shtetërore të përpunimit të naftës, ARMO, është paraqitur para medias dhe opinionit të gjerë publik administratori i ardhshëm i konsorciumit amerikan, që ka blerë faktikisht ARMO-n. Rezart Taçi doli në një konferencë për shtyp në Hotel 'Rogner', duke deklaruar se "jo vetëm që punëtorët ekzistues nuk do të pushohen nga puna, por përkundrazi, do të rimerren në punë ata që janë larguar si pasojë e reformës, madje edhe punëtorë të rinj". Sipas Taçit, pas privatizimit, synohet që çmimi i naftës që konsumohet në vend të pësojë ulje.
Punonjësit
"Asnjë punëtor i ARMO-s nuk do të hiqet nga puna". Është ky lajmi i mirë që erdhi nga blerësit e ARMO-s. Gjithashtu, Taçi tha se privatizimi do të sjellë edhe avantazhe të tjera, të tilla si përmirësime në sistemin e pagave, ashtu edhe në drejtim të çmimit të naftës. Ai tha se "rritja e pagave do të bëhet në masën 30% dhe kjo, që në muajin e parë". Sipas Taçit, "synimi prioritar tashmë do të jetë ulja e çmimit të naftës që konsumohet në tregun vendas". Ai shpjegoi se një gjë e tillë mund të arrihet, pasi të përpunohet nga ARMO e gjitha nafta e vendit me teknologji bashkëkohore. Përfaqësues të konsorciumit kanë pohuar publikisht se e gjithë pjesa e mbetur e shumës së ofruar do të paguhet në një këst të vetëm, menjëherë sapo Kuvendi i Shqipërisë të ratifikojë marrëveshjen e Ekzekutivit me konsorciumin blerës.

(s.g/GazetaShqiptare/Balkanweb)