TIRANE- Qeveria shqiptare pranon më në fund rrezikun që paraqet zona e tragjedisë në Gërdec. Gjatë një interviste për ‘Vizion Plus’, ministri i Mbrojtjes, Gazmend Oketa, ndryshe nga pak javë më parë, deklaroi se mund të flitet për rrezikun e shpërthimeve në Gërdec.
“Mund të flitet për dy rreziqe, rreziku i një shpërthimi të mundshëm brenda zonës së rrethuar, i cili është një rrezik për të cilin ne punojmë çdo ditë për ta evituar”, - u shpreh kreu i Mbrojtjes shqiptare, Oketa. Ndërsa pjesa tjetër e rrezikut, sipas tij, “konsiderohet rreziku ambiental”. “Unë jam njohur me analizat e bëra për ajrin, ujin apo tokën dhe deri më tani nuk rezulton të ketë shqetësime të ndotjes ambientale”, - u shpreh Oketa. Ministri i Mbrojtjes vizitoi pak javë më parë zonën e Gërdecit, i shoqëruar edhe nga ambasadori i SHBA-së në Tiranë, Xhon Uidhers. Gjatë takimit me banorë të zonës, Uidhers dhe Oketa dhanë mendime të ndryshme ndërsa flisnin me ta. Ambasadori i SHBA-së u sugjeroi banorëve që të mos ndërtojnë shtëpitë e tyre në kraterin e shpërthimit, duke qenë se bëhet fjalë për një hapësirë të rrezikshme. Nga ana e tij, ministri i Mbrojtjes, Oketa u shpreh se zona ishte e sigurt dhe se forcat e ushtrisë po punonin për këtë. Ndërsa pak kohë më pas, Oketa pohon në këtë intervistë se ekziston rreziku i shpërthimit. Ai thotë se nëse do të ndodhte, do të sillte një katastrofë të dytë, pasi lëndët kimike do të ndotnin të tërë zonën. Sipas Oketës, deri më tani është bërë një punë e mirë me largimin e mbetjeve nga predhat e shpërthyera nga zona, por mbetet një punë e madhe në nxjerrjen e predhave aktive që ndodhen të groposura thellë në tokë. Gjatë bisedës që Uidhers ka bërë me banorët u shpreh se: “Mendimi im është që kjo zonë nuk është bërë e sigurt ende. Mendoj që po ndërtoni tepër pranë materialesh që janë ende shumë të rrezikshme”. Duke dëgjuar banorët, Uidhers edhe pyeti se kush u tha që të ndërtojnë, ndërsa banorët i kanë thënë se këtë premtim për të ndërtuar e kanë nga pushtetarët. Ndërsa ministri Oketa, gjatë kësaj vizite tha se “po punohet, dhe ne si Ministri e Mbrojtjes jemi të vendosur që puna të vazhdojë duke zbatuar me rreptësi masat e sigurimit teknik dhe për të garantuar jetën banorëve të zonës”. Ndërkohë, në një analizë tij, toksikologu veterinar Qemal Poçi, tha për gazetën para pak ditësh, se në Gërdec kanë mbetur elementë toksikë që janë një rrezik real ende. Ai vuri në dukje se në Gërdec shpërthyen 3 mijë ton barut dhe rreth 300.000 metra kub gazra toksike mbuluan hapësirën. 200 metra nga epiqendra e shpërthimit në Gërdec u gjet dioksin, helm shumë i fuqishëm me veti të theksuara kancerogjene, shpjegon toksikologu Poçi. Sipas kësaj analize, “dioksina shkakton edhe patologji të përgjithshme në traktin gastrointenstinal, sistemin nervor, organet e riprodhimit, mëlçinë e zezë, etj.

(s.g/GazetaShqiptare/Balkanweb)