TIRANE- Nard Ndoka "kalon" majtas. Lideri i demokristianëve e sheh të mundshme aleancën me opozitën, në mënyrë të veçantë me Lëvizjen Socialiste për Integrim. Ai e sheh të paarsyeshme një përsëritje të bashkëpunimit me Partinë Demokratike, për sa kohë kjo e fundit sipas tij, ka hapur një luftë të paprinciptë ndaj demokristianëve. Megjithatë, Ndoka nxiton të saktësojë se gjithsesi, vendimi përfundimtar për bashkëpunimin politik me të majtën apo të djathtën do të merret pas hartimit të Kodit të ri Elektoral. "Akoma nuk ka një kod të miratuar. Në varësi të këtij kodi, pa diskutim që PDK-ja do shohë aleancat e ardhshme parlamentare", - shprehet ai. Qëndrimin në fjalë, kreu i PDK-së e bëri publik gjatë një prononcimi të djeshëm për mediat.
Bashkëpunimi me LSI-në
Kalimin e demokristianëve në një llogore me opozitën, Ndoka e justifikon me situatën konfuze, ku sipas tij ndodhet e djathta. Duke fajësuar PD-në për mënyrën se si ka ndërtuar marrëdhëniet me aleatët e saj e në veçanti për sjelljet e pasinqerta me demokristianët, ai shton se nuk ka më kuptim që PDK-ja e PD-ja të jenë bashkë në të njëjtin koalicion. "Nuk e përjashtoj mundësinë e bashkëpunimit me LSI-në. Kampi i djathtë, realisht është mjaft konfuz në këto momente. Edhe lufta që PD-ja ka bërë ndaj PDK-së dhe që akoma vazhdon të bëjë diversion në radhët e kësaj të fundit, e bën akoma më të vështirë dhe më të komplikuar koalicionin në një kamp të djathtë, ose frymën e mirëkuptimit brenda partive të djathta", - ka vënë në dukje lideri demokristian.
Qeverisja e dështuar
Ndërkaq, referuar tre vjet qeverisjes së të djathtës, Ndoka, i larguar vetëm pak kohë më parë nga drejtimi i Ministrisë së Shëndetësisë, thotë se një mandat tjetër është i dyshimtë. Fitorja e së djathtës në zgjedhjet parlamentare të 2009-ës konsiderohet prej tij një mision i pamundur, nëse deri në zgjedhje nuk do të ketë ndryshime të dukshme në kabinetin qeverisës.
Ndoka-Meta
Në 17 tetor 2006, Ilir Meta shkoi në selinë e demokristianëve në takimin me kryetarin Ndoka dhe bashkërisht thanë se ishin pajtuar për një sërë çështjesh që do t'i shtynin të bashkëpunonin në të mirë të interesave integruese të vendit. Rezultatet e takimit me Metën, u përmblodhën në të quajturin "Pakt Mirësjelljeje", të propozuar prej Ndokës. Pakti, sipas kreut të PDK-së, synonte të shmangte fyerjet e akuzat e pabazuara, sharjet personale si dhe t'u jepte hapësirë alternativave. Sakaq, Meta për të njëjtën çështje tha se "takimi u nxit nga dëshira dhe vullneti për të kontribuar për rikthimin e normalitetit në jetën politike, institucionale dhe parlamentare në vend".

(s.g/GazetaShqiptare/Balkanweb)