TIRANE-Edhe maxhoranca ka reaguar për gjobën që KKRT i vendosi TV News 24 pas transmetimit të një spoti kritik ndaj kryeministrit Berisha. Kreu i Partisë Demokristiane, Nard Ndoka e konsideroi jo normale idenë e kryeministrit për të bërë spote ku ai “bën edhe prokurorin edhe gjykatësin e luftës kundër korrupsionit”. “Ka mekanizma për të luftuar korrupsionin. Jo normale që një kryeministër të bëjë spote për luftën kundër korrupsionit”, u shpreh Ndoka. Kreu i demokristianëve, i cili deri pak muaj më parë drejtonte Ministrinë e Shëndetësisë, tha se gjithçka duket sikur kryeministria po drejton Këshillin Kombëtar për Radio dhe Televizionin. Për PDK ekziston shpresa se gjoba mund të diskutohet ende në KKRT. “Mendoj se vendimi për gjobën nuk është përfundimtar. Vendimi është marrë nga inspektorët dhe anëtarësia e KKRT do ta diskutojë dhe votojë”, shtoi Ndoka.
Për gjobën e vendosur nga KKRT në adresë të TVNews24 reaguan dhe opozita. PS, PSD dhe deputetë të tjerë të majtë thanë dje njëzëri se gjoba ka autor të vërtetë kryeministrin Berisha. Opozitarët e akuzuan Berishën se po përdor KKRT për interesa personale dhe se po abuzon me paratë e taksapaguesve shqiptarë për të realizuar spote televizive që kushtojnë miliona lekë.
(d.b/BalkanWeb)