TIRANE- Prokuroria e Krujës vë nën hetim dhjetë pronarë furrash gëlqerore, nga aktiviteti i të cilave është shkaktuar ndotje e madhe e ajrit duke kërcënuar shëndetin e banorëve të zonës. Në një njoftim për shtyp të Prokurorisë së Përgjithshme, thuhet se kanë nisur dhjetë procedime penale ndaj subjekteve që kanë ngritur kamina (gropa) gëlqerore në rrethin e Krujës, ku gjatë djegies së gomave të makinave, sfungjerëve, etj, kanë shkaktuar ndotje të mëdha, duke sjellë ndryshim të cilësisë së ajrit, prishje të disekuilibrit të sistemit natyror, si dhe dëmtime në shëndetin e banorëve të komunitetit të zonës. Pas shqetësimeve të këtyre të fundit, ekspertë të Institutit të Shëndetit dhe Higjienës në Tiranë, kanë “zbarkuar” në Krujë për të kryer matjet lidhur me nivelin e ndotjes së ajrit, e cila ka rezultuar mjaft e lartë. Në këto kushte, prokurori i rrethit, Florian Bonjaku ka firmosur nisjen e hetimeve për dhjetë pronarë furrash gëlqerore për veprën penale të “ndotjes së ajrit”. Pronarët e kaminave janë shoqëruar në komisariat, ku kanë dhënë shpjegime në lidhje me aktivitetin që kryenin. Si dhe janë detyruar të tregojnë të gjithë dokumentacionin që disponojnë për ushtrimin e tij, gjë që në fakt nuk ka qenë në favorin e tyre, për shkak se u janë gjetur mjaft mangësi.
Hetimet
Ajri i ndotur nga djegia e gomave të makinave në furrat gëlqerore, apo materialeve të tjera që shkarkojnë blozë dhe gazra helmuese, është bërë tejet shqetësues për banorët e Krujës. Ankesat e tyre duket se këtë herë nuk kanë rënë në vesh të shurdhër, pasi drejt këtij qyteti janë nisur ekspertë të Institutit të Shëndetit dhe Higjienës në Tiranë, për të bërë matjen e ndotjes së ajrit, që për fat të keq ka rezultuar shumë e lartë. Ekspertët kanë verifikuar faktin se ndotja vinte nga djegia e gomave në furrat gëlqerore. Sapo prokuroria u njoh me raportin e ekspertëve që vinin alarmin për nivelin e lartë të ndotjes që rrezikonte jetën e banorëve, firmosi për vënien nën hetim të dhjetë pronarëve të furrave gëlqerore. Zyrtarisht, prokuroria deklaron se subjektet nuk dispononin dokumentacionin e duhur ligjor për të ushtruar një aktivitet të tillë që shkaktonte ndotje tepër të lartë të ajrit, ndaj dhe është vendosur sekuestrimi i tyre.
“Këto kamina (gropa) gëlqerore përdornin për lëndë djegëse dhe materiale goma të përdorura makinash, sfungjerë, mbetje plastike, të cilat shkaktojnë një ndotje të lartë të ajrit nëpërmjet shkarkimit të blozës dhe gazrave helmuese. Si rrjedhim i përdorimit të lëndëve të kësaj natyre, ndotja në ajër rezulton të jetë disa herë më e lartë se normat e lejuara nga legjislacioni mjedisor. Në këto kushte, kanë filluar hetimet për dhjetë persona për veprën penale të “ndotjes së ajrit”, thuhet në njoftimin për shtyp. Aktualisht, në dosjet e prokurorisë gjenden mjaft prova që i implikojnë këta pronarë në ushtrimin e veprimtarisë së jashtëligjshme, si tabela fotografike të furrave gëlqerore, lëndët djegëse që janë përdorur në to, si dhe mjaft dokumente të tjera.

(s.g/GazetaShqiptare/BalkanWeb)