TIRANE- Të gjithë ata që duan të kenë në xhep një diplomë të dytë, duhet të nxitojnë të bëjnë aplikimin e tyre, pranë sekretarive të fakulteteve ku duan të ulen edhe një herë nëpër auditore. Bëhet fjalë për të gjithë ata kandidatë, të cilët janë diplomuar njëherë, por duan të marrin edhe një diplomë të dytë. Për këtë kategori studentësh, Këshilli i Ministrave ka vënë në dispozicion për këtë vit akademik, plot 500 vende.
Përzgjedhja
Ndryshe nga ata që garojnë për t'u ulur në auditoret e universiteteve për herë të parë, kjo kategori studentësh nuk u nënshtrohet konkurseve, por garojnë mes tyre me dosje. Që do të thotë se secili prej këtyre kandidatëve duhet të plotësojë një dosje që përmban: diplomën e shkollës së lartë, listën e notave, curriculum vitae, titujt e tjerë (nëse ka), eksperiencat në punë. Pas përfundimit të procesit të dorëzimit të dokumentacionit, dosja e secilit kandidat merret në shqyrtim dhe do të përzgjidhet si fitues, ai që ka të dhënat më të favorshme. Kriteri kryesor për të nisur studimet në një fakultet të dytë është ngjashmëria midis dy cikleve të studimit. E thënë ndryshe një kandidat që ka tashmë një diplomë të Matematikës te Shkencat e Natyrës, ka mundësitë më të mëdha për të fituar në një nga degët e Inxhinierisë te universiteti Politeknik se ai që ka një diplomë Historie, por nga ana tjetër ai që është diplomuar për Histori, do të jetë preferencë kryesore për fakultetin e Drejtësisë. Sekretaritë e fakulteteve janë të hapura për të pritur të gjithë ata që duan të nisin studimet e dyta, ndërsa afati i fundit i dorëzimit të dokumentacionit të kërkuar është vendosur data 10 shtator. Pas kësaj date do të fillojë seleksionimi i fituesve. Këshilli i Ministrave ka përcaktuar për këtë sistem studimesh plot 500 kuota për këtë vit akademik, ndërkohë që koston e studimeve do ta përballojnë vetë kandidatët, për arsye se shteti ka kontribuar njëherë për shkollimin e tyre, kur janë diplomuar për herë të parë. Tarifat e studimit janë të ndryshme, në varësi të rëndësisë që ka diploma që ata kërkojnë.

(s.g/GazetaShqiptare/Balkanweb)