TIRANE- Ministri i Brendshëm, Bujar Nishani deklaroi se do të kërkohet shtyrja e afatit të moratoriumit të skafeve dhe mjeteve të tjera lundruese në vend. Lajmi u bë publik pas analizës 7-mujore të Ministrisë së Brendshme. "Policia bregdetare nuk ka mjete në dispozicion për të mbikëqyrur dhe ruajtur vijën detare nga trafikimi me të tilla mjete lundruese", - tha Nishani duke theksuar se do kërkohej shtyrja e moratoriumit të skafeve, që skadon në pranverë. Nëse kërkesa e Ministrisë së Brendshme do të miratohej nga qeveria, do duhej votimi në parlament për ta aprovuar atë. Moratoriumi "Për mjetet motorike lundruese", ka hyrë në fuqi në 25 prill të vitit 2006 dhe shfuqizohet fundprillin e vitit të ardhshëm. Pothuajse e gjithë analiza e Ministrisë së Brendshme, e bërë publike nga ministri Nishani, bazohej në arritjet dhe rezultatet e Policisë së Shtetit. Ai ka përsëritur deklaratën e tij se shtesa në pagat e punonjësve të policisë është miratuar dhe tashmë procesi është në kuadrin e shkëmbimit të informacionit me Thesarin e Shtetit dhe Ministrinë e Financave. Nishani ka sulmuar gjyqësorin, për faktin e dënimeve të buta apo të lirimit të padrejtë të disa prej të arrestuarve.
Arritjet
Sipas Nishanit, në 7 muaj janë goditur 69 grupe kriminale me 280 anëtarë të arrestuar. Ashtu si një muaj më parë Drejtori i Përgjithshëm i Policisë, Ahmet Prençi, edhe ministri Bujar Nishani iu referua statistikave të policisë italiane, sipas të cilave, në Apenine janë kapur vetëm 6.5 kilogramë heroinë, 3.2 kilogramë kokainë dhe 4 kilogramë marijuhanë, të ardhura nga Shqipëria. Për Nishanin, këto shifra përbëjnë minimumin historik, pasi në vitin 2007 ishin kapur në Itali 100 kilogramë drogë, dhe në vitet 2003-2005, sasia e sekuestruar në Itali varionte nga 3-4 ton drogë. Ministria ka përgëzuar punën e policisë, të bërë në kuadrin e luftës kundër korrupsionit. "Është trefishuar forca goditëse ndaj këtij krimi, ndërsa statistikat flasin për 232 vepra penale të regjistruara, nga të cilat janë proceduar 377 persona të implikuar. Në konferencë është përgëzuar edhe puna "cilësore" e strukturave të Antikrimit Ekonomik, ku ministri Nishani ka përmendur goditjen e rrjetit të vjedhjes së bankomateve të bankave "Matrix". 22 operacionet antitrafik, ose 4 më shumë se e njëjta periudhë e vitit të kaluar, kanë goditur 18 grupe kriminale me 115 të arrestuar, nga të cilët, 21 shtetas të huaj. Nga 215 dosje të vjetra të krimeve të rënda, të rihapura gjatë vitit 2008 janë zbuluar 164 prej tyre, duke shënuar rekord për këtë tregues të kriminalistikës në vend.

(s.g/GazetaShqiptare/Balkanweb)