TIRANE-  Dyndje aplikantësh për të fituar një vend pune në Universitetin e Tiranës. Rektorati i UT-së, që prej datës 12 gusht, kur edhe hapi procedurat për punësimin e 160 pedagogëve të rinj, përballet çdo ditë me radhë të gjata personash që presin të dorëzojnë dosjet. Mësohet se kur kanë mbetur edhe dy ditë nga afati i fundit i pranimit të dokumentacionit, kanë dorëzuar dosjet plot 350 aplikantë, nga të cilët 50 janë diplomuar jashtë Shqipërisë. Ndërkohë, rektori Dhori Kule, ka deklaruar se nuk do të lejohet më dypunësimi i pedagogëve, përveç rasteve kur universitetet kanë marrëveshje bashkëpunimi midis tyre.
Pedagogët e rinj
Duket se gara për të plotësuar 160 vende me pedagogë në Universitetin e Tiranës do të jetë mjaft e fortë. Kur kanë mbetur edhe dy ditë nga afati i fundit i dorëzimit të dokumentacionit të kërkuar, në rektoratin e UT-së kanë mbërritur plot 350 dosje nga të cilat 50 prej tyre janë diplomuar jashtë Shqipërisë. Ervin Demo, drejtor i marrëdhënieve me publikun në UT, ka shpjeguar se pas dorëzimit të dokumentacionit, dosjet do të shpërndahen nëpër fakultete, nga ku më pas do t'i nënshtrohen selektimit të detajuar nga deparetamentet përkatëse. "Afati i fundit i dorëzimit të dosjeve është 29 gushti. Pas kësaj periudhe, dosjet do të dërgohen në çdo departament, të cilët do të përzgjedhin fituesit e fazës së parë, që duhet të plotësojnë minimalisht kriteret e publikuara nga rektorati i UT-së. Fituesit e kësaj faze do t'i nënshtrohen një testi të dytë, që do të jetë dalja përpara një komisioni të veçantë, i cili ngrihet në çdo departament dhe që do të bëjë edhe selektimin final", - ka shpjeguar ai. Emrat e 160 personave që do të fillojnë punë si pedagogë të brendshëm në Universitetin e Tiranës do të shpallen më 15 shtator.
Deklarata
Dhori Kule, rektori i Universitetit të Tiranës, ka deklaruar se nuk do të lejojë që stafi akademik të punojë në universitetet publike dhe ata private. Ai ka sqaruar se do të ndërtohet një marrëdhënie e tillë vetëm në bazë kontratash të rregullta dhe vetëm me ata universitete private, me të cilat UT-ja ka firmosur marrëveshjet e bashkëpunimit. "Këtë vit akademik nuk do të lejohet më dypënsimi i pedagogëve në shtet dhe në privat. Kjo, me përjashtim të rasteve kur universitetet ndërmjet tyre kanë marrëveshje bashkëpunimi. Për institucionet e tjera të arsimit të lartë publik do të ndalohet kategorikisht lejimi i dypunësimit të pedagogëve", - ka deklaruar kreu i Universitetit më të madh publik, i cili ka shtuar se edhe në këtë rast do të jetë një komision i veçantë që do të përcaktojë se cili pedagog do punojë në privat dhe si do të ndajë ngarkesën mësimore mes privatit dhe publikut, në mënyrë që të mos ketë humbje leksionesh apo seminaresh. Deri më tani, Universiteti i Tiranës, ka marrëveshje bashkëpunimi vetëm me dy universitete private si dhe me atë të Tetovës.

(s.g/GazetaShqiptare/Balkanweb)