TIRANE- Ka provuar nëse arma e gjetur mes mbeturinash qëllonte, dhe tashmë rrezikon jetën babai i pesë fëmijëve. Me të vërtetë një histori e dhimbshme ajo e 35-vjeçarit Lulëzim Aliu, i cili mbante familjen me hekurishtet që grumbullonte mes mbeturinave. Pasditen e së premtes, ai mendoi ta provonte me automatikun tip “Kallashnikov”, që në pamje të jashtme dukej i “katandisur keq”. Nuk dihet sa kohë mund të kishte mes mbeturinash arma, por Aliu mendoi ta provonte përpara se ta fuste me hekurishtet e tjera për ta shitur për skrap. Arma ka shkrehur, ndërsa plumbi e ka kapur Aliun në këmbë. Ai ka përfunduar në spital në gjendje të rëndë, ndërsa plumbi mësohet se e ka goditur në damarin femoral. Policia ka kryer veprimet e para hetimore, duke e konsideruar ngjarjen aksidentale. Deri në orët e vona të mbrëmjes së djeshme, prokurori i gatshëm nuk kishte vendosur ende nëse ndaj të plagosurit duhej vendosur masë arresti për “armëmbajtje pa leje”.
Ngjarja
Rreth orës 15:17 të pasdites së të premtes, një plumb i shkrehur nga automatiku kallashnikov ka tërhequr vëmendjen e banorëve të lagjes së romëve në Shkozë të Tiranës. Lulëzim Aliu ishte kthyer nga “puna” me një armë kallashnikov, të gjetur mes mbeturinave ku rrëmonte për hekur. Sipas dëshmive të familjarëve në polici, Aliu ishte në gjendje të dehur kur me armën në dorë kishte nisur të bënte “lojëra”. Në një moment, ai e ka mbushur armën për të provuar në ajër nëse qëllonte, por nga gjendja e dehur nuk ka mundur ta mbajë dot atë. Në momentin që dora është ulur drejt tokës, arma është zbrazur duke e qëlluar në këmbë. Të afërmit dhe miqtë e kanë dërguar menjëherë për ndihmë mjekësore në Spitalin Ushtarak.
Policia
Shërbimi i policisë në Spitalin Ushtarak, ka dhënë i pari njoftimin se një person i plagosur kishte mbërritur për ndihmë mjekësore. Një grup oficerësh të Komisariatit numër 1 të Policisë së Tiranës dhe të Seksionit të Krimeve kundër Jetës dhe Shëndetit, kanë nisur menjëherë hetimet për sqarimin e plotë të ngjarjes. Provat e grumbulluara por edhe dëshmitë e familjarëve dhe dëshmitarëve, e kanë klasifikuar ngjarjen si aksidentale.

(s.g/GazetaShqiptare/Balkanweb)