TIRANE- Ministri i Bujqësisë Jemin Gjana, ka kundërshtuar raportin e Fondit Monetar Ndërkombëtar të bërë publik pak ditë më parë në të cilin kritikohet situata në sektorin e bujqësisë. Sipas tij shifrat e evidentuara nga FMN-ja i përkasin vitit 2007, ndërkohë që gjatë këtij viti treguesit në bujqësi janë pozitiv.
Gjatë analizës 7 mujore të punës të dikasterit që drejton, ministri Gjana është ndalur vetëm tek sukseset, ndërkohë që ka refuzuar të japë shpjegime për një nga problemet kryesore që është ndarja e titujve të pronësisë mbi tokën bujqësore.
Mes debateve të ashpra me opozitën mazhoranca miratoi në korrik të këtij viti, ligjin për verifikimin e titujve të pronësisë mbi tokën bujqësore, por deri tani qeveria dhe institucionet në varësi të saj nuk kanë dhënë asnjë detaj lidhur me mënyrën se si do të realizohet ky proces. (a.r/news24/balknaweb)