UASHINGTON- Bordi i Drejtorëve të Korporatës Sfida e Mijëvjeçarit (KSM), ka miratuar në 15 gusht, propozimin e qeverisë shqiptare për Fazën e II-të të Programit të Pragut për zvogëlimin e korrupsionit dhe për forcimin e shtetit ligjor në Shqipëri. Dje, në një takim me kryeministrin Sali Berisha, drejtori i USAID-it, Eduard Landau, zyrtarisht njoftoi mbi vendimin e kësaj korporate për të mbështetur me një program prej 16.4 milionë dollarësh Shqipërinë. Ceremonia zyrtare e nënshkrimit midis të dyja qeverive do të zhvillohet në muajin shtator. USAID-i do të menaxhojë këtë program në partneritet me institucione të ndryshme qeveritare dhe joqeveritare shqiptare. "Ne jemi të kënaqur të mbështesim këtë program të rëndësishëm, për të ndihmuar Shqipërinë në luftën kundër korrupsionit dhe në trajtimin e reformave kryesore gjyqësore dhe në hapjen e rrugëve të reja për zhvillimin ekonomik", - tha Landau. Sipas tij, një program i Fazës së II-të do ta ndihmojë Shqipërinë të bëhet më konkurruese për programet e ndihmës dypalëshe të KSM-së, një kompakt KSM-je. Shqipëria aktualisht po zbaton një program Pragu të KSM-së, që përqendrohet në përgjigjen ndaj korrupsionit në tatime, në regjistrimin e biznesit dhe në prokurime. Programi planifikohet të përfundojë në muajin nëntor 2008.

(s.g/GazetaShqiptare/Balkanweb)