TIRANE- Shqipëria i ka shitur armë Gjeorgjisë me vlerë 3 milin dollarë në vitin 2006. Këtë e konfirmojnë të dhënat e Qendrës Shqiptare për Tregtinë e Jashtme e cila në bashkëpunim me USAID-in publikon vazhdimisht të dhëna për import-eksportet shqiptare.

Konkretisht, gjatë vitit 2006, qeveria i ka shitur Gjeorgjisë bomba, granata dhe municione me vlerë 2.3 milionë euro apo 2.9 miliardë lekë. Ky informacion duket se rrëzon kryekëput pretendimin e kryeministrit Berisha se akuza e rusëve për tregti armësh me Tbilisin është "një invencion" apo shpikje. Kreu i qeverisë i hodhi poshtë akuzat e shefit të shtabit të Ushtrisë ruse po duket se të dhënat që vijnë nga specialistët përgënjeshtrojnë pretendimin e Berishës.

Dy ditë më parë, shefi i shtabit rus akuzoi disa vende të rajonit si Serbinë, Shqipërinë e Rumaninë se i kishin shitur armë Gjeorgjisë. Ky fakt, nuk është se i implikon këto shtete duke qenë se tregtia e armëve është e ligjshme dhe për më tepër Tbilisi zyrtar synon seriozisht të anëtarësohet në NATO. Çështja e tregtisë së armëve u shtrua sërish pas konfliktit të armatosur që shpërtheu në Osetinë e Jugut ku "paqeruajtësit" rusë u përplasën me forcat ushtarake gjeorgjiane. Qeveria shqiptare ka shitur armë në mjaft vende të globit duke përfshirë edhe Gjeorgjinë e madje edhe Izraelin. Kjo çështje është trajtuar gjerësisht kohët e fundit në Shqipëri për arsye se prokuroria shqiptare po heton kreun e MEICO-s, Ylli Pinari për tregti të paligjshme armësh.

Agjencia shtetërore e import-eksportit të armëve ka patur gjatë gjithë këtyre viteve monopolin e tregtisë dhe shpesh ajo është vënë në qendër të dyshimeve për korrupsion. Kreu i kompanisë, Ylli Pinari ka qenë prej vitit 2005 në "watch-listën" e Departamentit amerikan të Shtetit si person jo i besueshëm për të bërë biznes.

Qendra Shqiptare për Tregtinë e Jashtme (ACIT) është një projekt privat, ku bashkëpunon USAID-i amerikan. Kjo qendër funksionon që nga viti 2002 dhe që atëherë nuk ka pasur vërejtje për seriozitetin e të dhënave të saj, për më tepër që ato bazohen gjithnjë në statistikat zyrtare të vetë shtetit shqiptar. Pra, të dhënat e publikuara prej ACIT-it lidhur me eksportin e armëve në Gjeorgji në vitin 2006 kanë dalë nga vetë Doganat. Në fakt, jo rrallë herë drejtoria a Doganave ka fshehur të dhënat për import-eksportin e armëve. Pak muaj më parë, një sasi konteinerësh u regjistrua si import armësh, ndërkohë që në fakt ngarkesa ishte kthyer në Shqipëri pas një përpjekjeje të dështuar për ta shitur në Armeni. Trafiku i armëve mbetet një nga çështjet më të errëta të historisë së pluralizmit e që për fat të keq ka patur për protagonistë pushtetarë të majtë e të djathtë.
Një ditë më parë kryeministri Berisha mohoi akuzat e Moskës për tregti armësh. Kreu i qeverisë i cilësoi këto akuza shpikje dhe ashpërsoi qëndrimin ndaj Rusisë, duke deklaruar se sjelljet e saj ndaj vendeve të vogla janë të dënueshme. Deklarata e kryeministrit u bë në një konferencë të përbashkët për shtyp me homologun e tij islandez, Geir Haarde.

(s.g/GazetaShqiptare/Balkanweb)