TIRANË-Policia e Tiranës ka marrë të gjitha masat e mundshme për sigurimin e rendit dhe qetësisë gjatë zhvillimit neser të ndeshjes ndërkombëtare të futbollit "Shqipëri –Suedi. Ndeshja pritet të zhvillohet të shtunën më datë 6 shtator, ora 18.45, në stadiumin Kombëtar “Qemal Stafa” në Tiranë.
Nëpërmjet një komunikate për shtyp, Drejtoria e Policisë së Qarkut të Tiranës, ka bërë të ditur për agjencinë BalkanWeb se për ndehsjen ka kërkuar ndërkohë edhe mirëkuptimin e qytetarëve se për të parandaluar çdo lloj incidenti, do të ndërpresë për disa orë qarkullimin me automjete në disa akse të Tiranës. Pritet që nga ora 08.00 e datës 6 shtator, deri në përfundim të ndeshjes të do të mbyllen lokalet përreth stadiumit, si dhe nuk do të lejohet parkimi i automjeteve në ambientet përreth Stadiumit Kombëtar në lokalet rreth stadiumit “Qemal Stafa”, sheshi “Italia”, sheshi “Nënë Tereza”, gjatë Bulevardit “Dëshmorët e Kombit” deri tek Hotel “Sheraton”.

Kurse duke filluar nga ora 15.00 e datës 6 Shtator e deri në përfundim të aktivitetit do të ketë ndalim qarkullimi të automjteve përreth Stadiumit Kombëtar “Qemal Stafa”, sheshit “Italia” sheshit “Nënë Tereza”, si dhe përgjatë rrugës “Lekë Dukagjini”, Bulevardi “Dëshmorët e Kombit” nga Presidenca deri te Hotel “Sheraton”, “Dervish Hima”.

(d.b/Balkanweb)