TIRANE- Nëpërmjet një deklarate për shtyp Ministria e Jashtme shqiptare deklaron se vendimi i Rusisë është në kundërshtim të plotë me të drejtën ndërkombëtare dhe me rezolutat e Këshillit të Sigurimit të OKB-së, të votuara edhe nga vetë Moska.

“Ministria e Punëve të Jashtme dënon vendimin e Rusisë për njohjen e pavarësisë të dy rajoneve të Gjeorgjisë, Abkhazisë dhe Osetisë së Jugut dhe e konsideron këtë hap të pajustifikueshëm, të papranueshëm dhe në kundërshtim të plotë me të drejtën ndërkombëtare dhe me rezolutat e Këshillit të Sigurimit të OKB-së, të votuara edhe nga vetë Rusia”.

Në vazhdim të deklaratës, Ministria e Punëve të Jashtme hedh poshtë me vendosmëri cdo përpjekje për vendosur paralele midis Kosovës dhe rajoneve autonome të Gjeorgjisë, Abkhazisë dhe Osetisë së Jugut.

“Argumente të panumërta historike, shkencore e juridike dëshmojnë se rasti i Kosovës është unik dhe zgjidhja e zbatuar për të është unike. Si i tillë, ai nuk shërben e as nuk mund të shërbejë si model për zgjidhjen e konflikteve të tjera as në rajon, as jashtë tij”- vazhdon deklarata për shtyp e Ministrisë së Jashtme.

Sipas Diplomacisë shqiptare me këtë vendim Moska po kompromenton përpjekjet e bashkësisë ndërkombëtare për zgjidhjen e drejtë, realiste dhe të qëndrueshme të konflikteve.
Ministria e Punëve të Jashtme e mbyll deklaratën e saj për shtyp me thirrjen që ndërkombëtarët i kanë drejtuar Moskës për të rishikuar vendimin e saj për Abkazinë dhe Osetinë e Jugut.

“Shprehim mbështetjen e plotë për integritetin territorial dhe sovranitetin e Gjeorgjisë dhe i bashkohet thirrjes drejtuar Moskës zyrtare që, në mbështetje të të drejtës ndërkombëtare dhe parimeve themelore të sigurisë europiane, të rishikojë vendimin e saj për njohjen e Abkhazisë dhe Osetisë së Jugut, pasi vetëm kështu i kontribuohet paqes dhe stabilitetit në rajon e më gjerë”.

(Balkanweb)