LONDER- Shqipëria listohet ndër vendet që trafikojnë fëmijët për shfrytëzim seksual. Lajmi është dhënë në mediat britanike “Herald Tribune”, “The Guardian” si dhe në BBC, ku citohet një raport i një koalicioni të organizatave bamirëse për fëmijët. Raporti në fjalë thotë se Shqipëria, bashkë me Ganën e Kamboxhian bëjnë pjesë në turizmin seksual të femijëve, të cilët më pas shfrytëzohen në Britaninë e Madhe. Në fakt raporti ngre kritika të mëdha për qeverinë britanike që bën një vesh shurdh e një sy qorr ndaj këtij fenomeni. Fëmijët lejohen të udhëtojnë nga një vend në tjetrin për të ushtruar turizmin e seksit dhe shumë pak tutorë apo abuzues janë përballur me drejtësinë. Shumica e abuzuesve thotë raporti janë mësues por edhe vullnetarë që punojnë në jetimore. Raporti thotë se pedofilët britanikë po fitojnë lirshëm akses tek fëmijët e vendeve të ndryshme të botës. Ndërkohë qeveria britanike ka nisur të marrë masat pë të ndalur këtë fenomen. Muajin e shkuar qeveria miratoi një vendim sipas të cilit lejohet që pedofilët që abuzojnë me fëmijet jashtë vendit të gjykohen në Britani pavarësisht nëse vendi ku ata kanë abuzuar lejon apo jo seksin me fëmijët. Në raport përmendet rasti i britanikut Geri Fliter i cili është burgosur pasi akuzohet kreu marrëdhënie seksuale me dy vajza të moshës 10 dhe 11 vjecare në Vjetnam. Fliter së shpejti pritet të deportohet në Britani.

Aktualisht në Shqipëri shtetasi anglez David Brown, ish administrator i qendrës “Fëmijët e tij”, në Tiranë është në gjykim për abuzime seksuale me fëmijë të mitur. Gjykimi i Brown në Shqipëri është ndjekur me vëmendje dhe nga media angleze. Gjithashtu në lidhje me këtë cështje u ekstradua nga Londra në Tiranë shtetasi greko-anglezi Dino Christodoulou 45 vjeç dhe skocezi Robin James Arnold 56 vjeç. Ata do të gjykohen në Shqipëri për abuzime seksuale pikërisht në shtëpinë e fondacionit “Fëmijët e Tij" te drejtuar nga David Brawn. 

(s.g/NEWS24/Balkanweb)