DURRES- Ministri i Mbrojtjes Gazmend Oketa verifikoi nga afër pastrimin e bazës ushatarake në Shkozet të Durrësit nga 59 kontenierët me municione të rrezikshme. Gjatë inspektimit që u zhvillua sot paradite në këtë zonë, ministri Oketa dha garanci se tashmë ajo që ishte një shqetësim dhe rrezik për banorët, i ngritur disa herë nga media, është eliminuar.
“Në më pak se dy muaj u bë e mundur eliminimi i një shqetësimi të ngritur edhe nga media në lidhje me 59 kontenieretë që mbanin afërsisht 1300 tonë municione”- tha Ministri i Mbrojtjes. Ai theksoi se “Kjo sasi municioni jo vetëm që është larguar nga depot në Shkozet, por është asgjësuar dhe pjesa e rrezikshme, diegoret dhe baruti. Pjesa tjetër e magazinuar mund të konsiderohet pjesë e parrezikshme e një shpërthimi”
Ministri i Mbrotjes falenderoi ushtarët dhe civilët, si dhe pushtetin lokal që ndihmuan që kjo pjesë e materialit ushtarak të asgjësohet.
Oketa u shpreh se ky ishte hapi i parë i një plan veprimi që ka hartuar kjo ministri në lidhje me asgjësimin e municioneve të vjetra, ndërkohë që hapa të tjerë do të ketë në vazhdim.
Pak ditë më parë është bërë asgjësimi i 2.5 tonë barut të zi në Mjekës. Nga data 1 shtator do të fillojnë të veprojnë disa grupe të ngritura qëllimisht për të zbatuar planin.
Ministri Oketa mbylli prononcimin e tij për mediat me premtimin se shumë shpejt rreziku i shpërthimeve do të ulet dhe do të rritet shkalla e sigurisë.
“Jam i sigurt se shumë shpejt do ju bëj me dije se rreziku është eliminuar. Se shkalla e rrezikut nga drita e kuqe do kalojë në jeshile, në një nivel më të ulët, pra do rritet më shumë siguria”

Pas shpërthimit që ndodhi në Gërdec të Vorës, më 15 mars, Shqipëria numëronte 26 zona të rrezikut me municione ushtarake që janë të depozituara prej shumë vitesh në depo me kushte të këqija. Madje disa prej këtyre depove ndodhen fare pranë qendrave të banimit. Ekspertët ushtarakë thonë se në këto depo ka rreth 100 mijë tonë municione. Më 15 mars të këtij viti nga shpërthimi i një fabrike demontimi të municioneve në Gërdec të Vorës gjetën vdekjen 26 persona, rreth 300 u plagosën si dhe u shkaktuan dëme të mëdha materiale
(s.g/Balkanweb)