TIRANE- Shtëpitë botuese duhet të kishin furnizuar libraritë me tekste shkollore deri më 15 gusht. Ky ishte afati i vendosur nga Ministria e Arsimit, por një pjesë e shtëpive botuese nuk kanë respektuar këtë afat, duke shkaktuar mungesa të theksuara të teksteve shkollore nëpër librari. Mungesa e disa teksteve i pengon librashitësit të pajisin me faturë tatimore prindërit dhe nxënësit, me qëllim kompensimin e tyre nga Ministria e Arsimit. Ata kanë nxituar t'i blejnë librat, për të evituar radhët e gjata dhe rrëmujën që u krijua një vit më parë. Mungesa të shumta në tekstet shkollore kanë gjimnazet, por më të mëdha janë ato në sistemin 9-vjeçar, ku librat përkatës ende nuk janë dorëzuar nga shtëpitë botuese të kontraktuara nga Ministria e Arsimit. Ndërkohë që Ministria e Arsimit këtë vit, për të eliminuar problemet dhe radhët për pajisjen e nxënësve me tekste, ka vendosur që të përshpejtohen afatet për dorëzimin e tyre nga shtëpitë botuese.

(s.g/Balkanweb)