Skandali i firmës “Agro Blend” ka mbërritur në Tropojë. Tashmë pesticidet e firmës kanë kalbur rreth 3000 rrënjë mollë. Fenomeni është denoncuar nga fermeri i prekur. 

TROPOJË - Skandali i  Firmës “Agro Blend”, ka prekur dhe rrethin e Tropojës. Pas farës së misrit shterpë, tashmë evidentohen edhe pesticide të skaduara. Rreth 3000 rrënjë me mollë janë kalbur si rezultat i pesticideve të skaduara, të blera nga një fermer i zonës në firmën “Agro Blend”, pronë e Kreut të Bashkisë së Vorës dhe Gërdecit Fiqiri Ismaili. Gjatë një lidhje telefonike për “News24” fermeri i dëmtuar Gjovalin Nikolla ka deklaruar se ka blerë dy herë pesticide në firmën “Agro Blend” për të luftuar sëmundjet dhe krimbat por pas kësaj të gjitha pemët e mollëve u krimbën.
“Unë mendoj se pesticidet kanë qenë të skaduara”, tha fermeri Nikolla. “Pas këtij skandali jam drejtuar në Ministrinë e Bujqësisë ku kanë ardhur dhe kanë verifikuar rastin dhe më kanë thënë të mos prononcohem për mediat. Mua më është shkaktuar një dëm shumë i madh pasi të gjitha pemët frutorë janë krimbur dhe pesticidet që kam blerë nuk më kanë dhënë asnjë efekt. Tashme mendoj se kjo gjë i takon shtetit për të na dëmshpërblyer”, përfundoi Gjovalin Nikolla.
(a.s/News24/Balkanweb)