VELIPOJË – DURRËS – Në bregdetin e Velipojës dhe të Durrësit sot janë shënuar dy viktima brenda pak orësh. Një vajzë 10 vjeçare nga Shkodra ka humbur jetën në plazhin e Velipojës ku ishte duke kaluar pushimet me familjen. Ka mjaftuar deti me dallgë dhe mosvëmendja e treguar e prindërve që vogëlushja brenda pak minutash të përpihet nga deti.
Dhe pse pas disa çastesh e mitura është nxjerrë në breg nga pushues të tjerë të ndodhur ato momente pranë saj, çdo përpjekje për ta risjellë në jetë ka qenë e kotë. Trupi I të miturës është dërguar në morgun e Shkodrës, ndërsa autoritetet vendore ngrenë shqetësimin e mungesës së rojeve bregdetare, projekti I cili nuk gjeti zbatim këtë vit për shkak të mungesës së fondeve.
Po sot në plazhin e Durrësit një person rreth të 30-tave, ende I paidentifikuar ka humbur jetën teksa lahej në det. Ai u gjet i mbytur nga të tjerë pushues të cilët lajmëruan ambulancën. Viktima do ti nënshtrohet autopsisë për të mësuar shkaqet që çuan në vdekjen e tij, ndërkohë që policia ka nisur punën për identifikimin.
(a.s/News24/Balkanweb)