TIRANE- Të 400 kompanitë e huaja private që shfrytëzojnë nëntokën shqiptare dhe eksportojnë jashtë, duke nisur nga dita e djeshme, do të kenë rritje deri në 10 për qind të taksave që do ti paguajnë shtetit për mallin e shitur.
Vendimi u bë publik në mbledhjen e djeshme të Këshillit të Ministrave, ku qeveria caktoi tarifat e reja të taksës nacionale të rentës minerare. Rritje do të ketë për artikujt të tillë si tregtimi i pllakave të gurit, graniti, nafta e gazi, si dhe mineralet e nëntokës. Deri më sot, të gjitha këto kompani, paguanin 3 deri në 10 mijë franga zvicerane në vit për çdo kilometër katror tokë, ndërsa në vazhdim, taksat për këto biznese shumëfishohen.
Investimet
Shumë nga investitorët e huaj, ishin joshur nga ideja e shfrytëzimit të nëntokës shqiptare ndërkohë që krahu i punës ishte i lirë, e taksat akoma në nivele të ulta. Por duket se një gjë e tillë nuk do të ndodhë më pas vendimit të djeshëm të qeverisë. Të gjithë ata që do të nxjerrin edhe pllaka guri nga Shqipëria do t'i japin shtetit 10 për qind të vlerës së mallit të shitur. E njëjta shifër sipas vendimit të KM është edhe për mineralet e argjendit, arit. Nuk mbeten jashtë listës me 10 përqind pagesë për shtetin për vlerën e mallit të shitur edhe për ato subjekte private që shfrytëzojnë nëntokën shqiptare për naftën e gazin dhe të tilla investime janë shtuar shumë në vend gjatë viteve të fundit. Tarifat e reja për taksën kombëtare të rentës minerare, i shtohen vendimeve të tjera të qeverisë për rritjen e pagave minimale apo edhe vendimit për pagesën e detyruar prej 6 milionë lekësh për minatorët etj. Në fakt, deri tani, asnjë nga kompanitë private dhe bizneset, nuk ka reaguar për këto vendime.
Ligji
Sipas legjislacionit në fuqi "Për taksat kombëtare" çdo person fizik apo juridik që është i licencuar dhe vepron në industrinë minerare, duhet të paguajë rentën për burimet që nxjerr nga nëntoka dhe mbitoka. Ky është një detyrim mujor i subjektit taksapagues në çastin kur shet në treg produktin. Renta përcaktohet duke shumëzuar vlerën totale të shitjes me shumicë të produktit me përqindjen e rentës të përcaktuar në bazë të vendimit të Këshillit të Ministrave. Pagesa bëhet brenda datës 15 të muajit pasardhës kur janë realizuar shitjet. Këtë taksë e marrin degët e doganave nëpër rrethe, në rastin e eksportit të produkteve minerare, ndërsa degët e tatimeve në të gjithë vendin ngarkohen për marrjen e saj në rast se produktet shiten e blihen brenda territorit të republikës. VKM e djeshme e qeverisë cakton shifra të larta për tregtimin e disa artikujve, duke rritur barrën fiskale për 400 kompani. Edhe renta minerare e atyre kompanive që shfrytëzojnë gëlqerorë, është rritur dyfish.
Qeveria "Berisha" deri tani ka ndërmarrë sheshin e taksave të ndryshme që kanë të bëjnë me fitimet. Kjo ka ndikuar në rritjen e barrës fiskale të atyre që paguhen më pak. Por ndër të tjera edhe rritja e mallrave nga importi, po rrit artificialisht të ardhurat nga TVSH apo taksa doganore e akcizat. Por duket se projektet për investime ambicioze nuk përballohen dot me taksa të ulëta.

(s.g/GazetaShqiptare/Balkanweb)