TIRANE- Maqedonia vijon të zbatojë regjimin e vizave për shtetasit shqiptarë, duke shkelur në mënyrë të njëanshme marrëveshjen e qarkullimit të lirë me Shqipërinë, e cila është duke u respektuar vetëm nga kjo e fundit. Deri dje në mesditë, autoritetet kufitare maqedonase kanë refuzuar kalimin e kufirit për të gjithë ata shtetas shqiptarë që nuk kanë qenë të pajisur me vizën përkatëse. Incidentet kanë ndodhur në të gjitha pikat kryesore të kalimit kufitar, ndërkohë që, qoftë Ministria e Punëve të Jashtme apo edhe ajo e Punëve të Brendshme të Maqedonisë, jo vetëm që nuk kanë dërguar rregulloren e re të aplikimit të marrëveshjes, por as që kanë qenë në dijeni të kësaj problematike. Në një prononcim për të përditshmen “KOHA”, që botohet në Shkup, autoritetet e Ministrisë së Brendshme maqedonase kanë pohuar se “nuk merren me këto çështje, të cilat janë në kompetencë të Ministrisë së Punëve të Jashtme”. Ndërsa te kjo e fundit, këshilltari i çështjeve konsullore, Refet Hajdari ka sqaruar për “KOHA”, se “do të mundohen që brenda pak kohësh të kapërcehet kjo anomali”. Hajdari, pasi pohon se të mërkurën marrëveshja ka hyrë në fuqi, shton se në këtë rast kemi të bëjmë me një neglizhencë që po përpiqen ta kompensojnë. Por në bazë të nenit 14 të Marrëveshjes mes dy vendeve, ajo ka hyrë në fuqi më datë 27 gusht 2008, që është data e marrjes së notës së fundit të palës maqedonase. Ndërkohë që edhe në Ministrinë e Punëve të Jashtme të Shqipërisë pohojnë se mosrespektimi nga pala maqedonase është një çështje që është kompetencë e Ministrisë së Punë të Brendshme maqedonase.
Pikat kufitare
Në vendkalimet kufitare me Shqipërinë, shtetasit shqiptarë vazhdojnë të kalojnë me viza, edhe përkundër lajmit për hyrjen në fuqi të marrëveshjes së qarkullimit të lirë mes dy vendeve. Edhe pse ishte paralajmëruar se nga 3 shtatori do të fillonte liberalizimi i vizave, kjo nuk ka ndodhur. Në pikën e kalimit kufitar të Qafë-Thanës, Tushemishtit dhe në Bllatë, shtetasve shqiptarë u është refuzuar hyrja pa viza. Autoritetet kufitare maqedonase në Qafë-Thanë pohojnë për të përditshmen “KOHA”, se ende nuk ka ardhur shkresa zyrtare nga ana e MPB-së. Sipas policisë kufitare të Bllatës, pritet që së shpejti të aplikohet dhe kalimi pa viza, por nuk japin afat se kur do të ndodhë kjo. Komisari Azem Jakuposki, tha se “nuk dihet se kur, shpresojmë që kjo të jetë për një kohë shumë të shkurtër”. Të enjten në Qafë-Thanë e Tushemisht shtetasit shqiptarë kanë kaluar duke u pajisur me vizë, ndërsa në Bllatë, ku numëroheshin shumë shtetas shqiptarë të cilët prisnin që të kalonin pa viza, thjesht për të vizituar qytetin fqinj, u kthyen sërish mbrapsht. Dy shtetase shqiptare, Frane Ndoci dhe Maria Lleshi, nga Shkodra që ishin nisur për të vizituar Dibrën, konfirmuan për të përditshmen maqedonase “KOHA” se ishin kthyer mbrapsht në vendkalimin kufitar nga autoritetet maqedonase, meqenëse nuk ishin pajisur me viza kalimi.

(s.g/GazetaShqiptare/BalkanWeb)