FIER- Policia e Fierit ka zbuluar arsenal armësh dhe eksplozivi në një banesë në fshatin Kurjan. Ka qenë shqetësimi i banorëve të fshatit për të shtënat e herëpashershme me armë nga banesa e Teki Metohut, 61 vjeç, i cili ka vënë në lëvizje policinë e Fierit. Me të marrë sinjalizimin e banorëve, uniformat blu kanë kryer kontroll të befasishëm në banesën e Metohut. Sipas policisë, në banesë janë gjetur dhe sekuestruar në cilësinë e provës materiale 1 automatik tip "Kallashnikov", 2 pushkë njëzetëshe, 1 krehër me 19 fishekë, 3 granata ofensive, si dhe 11 ndezës detonatorë. Armët e bllokuara kanë mjaftuar që policia t'i hidhte prangat në kushtet e flagrancës Teki Metohut. Ky i fundit është siguruar në ambientet e izolimit të Drejtorisë së Policisë së Fierit, me akuzën e "armëmbajtjes pa leje". Vetë Teki Metohu ka mohuar për policët, dyshimet për implikimin në shitblerjet e armëve. Ai ka pretenduar se armët dhe eksplozivin e kishte qysh prej trazirave të vitit 1997, dhe nuk i kishte dorëzuar.

(s.g/GazetaShqiptare/Balkanweb)