MONTEKARLO- Në Monte Karlo, UEFA ka ndarë edhe çmimet e vitit në Ligën e Kampioneve. Ajo që binte në sy ishte dominimi i futbollistëve që luajnë me skuadrat angleze, tre prej të cilave ishin deri në gjysmëfinale të sezonit të shkuar. Portieri më i mirë i vitit u shpall ai i Çelsit, Petër Çeh, të cilit iu dorëzua çmimi nga ish-gardiani i Mançester Junajtid Petër Shmajkëll.
Edhe pse humbi penalltinë që do t’i jepte Çelsit trofeun, Xhon Terri mund të ngushëllohet me çmimin e mbrojtësit të vitit në UEFA Champions League. Mesfushori i vitit ishte një duel tërësisht nga Premier Liga, me Frenk Lampard që mundi të lërë pas lojtarë si Fabregas, Stiven Xherard apo Mikael Esien. Në sulm, ashtu siç pritej, më i miri u shpall Kristiano Ronaldo, të cilit ia dorëzoi trofeun një legjendë e futbollit portugez, Eusebio. Ylli i Mançester Junajtid fitoi gjithashtu edhe trofeun e futbollistit më të mirë në Ligën e Kampioneve. (a.r/balkanweb)