TIRANE- Dinamo dhe Vllaznia do të çelin sot zyrtarisht sezonin 2008-2009 të futbollit shqiptar. Fituesja e kampionatit dhe ajo e Kupës do të ndeshen në orën 18 në stadiumin “Qemal Stafa”, për finalen e Superkupës, që është edhe trofeu i parë që do të fitohet nga njëra prej tyre. Nisur nga pjesëmarrja në Kupat e Evropës, dy skuadrat vijnë në formë të mirë fizike në këtë sfidë, ndërkohë që Vllaznia ka mundur të mbajë edhe treshen Sukaj, Teli e Lika për këtë takim. Pas një ndeshje kontrolli të zhvilluar dje, trajneri i Dinamos Zlatko Daliç, deklaroi se Vllaznia është favorite për të fituar në këtë sfidë, duke parë edhe përgatitjen e mirë fizike të saj. “Shkodranët janë para Dinamos përsa u përket përgatitjeve, pasi e kanë nisur shumë shpejt sezonin. Ky është një avantazh i madh për ta, megjithatë kjo nuk do të thotë se ne kemi frikë. Ne jemi skuadra kampione, kështu që kurrsesi nuk mund të jetë Vllaznia favorite”, deklaroi trajneri i kampionëve në fuqi të Shqipërisë. Blutë vijnë në këtë sfidë pas eleminimit të turpshëm nga boshnjakët e Modricës dhe të gjithë janë kuriozë për të parë punën e bërë nga tekniku kroat. Daliç konfirmoi gjithashtu se sulmuesi i rikthyer, Sebino Plako, do ta nisë nga stoli në këtë ndeshje. Ndërkohë, përsa i përket kampit shkodran, ai është mbushur me polemika pas humbjes 3-0 kundër Napolit. Edhe pse përballë ishte një ekip i Serisë A, presidenti Valter Fushaj nuk e ka pritur mirë faktin që skuadra e tij bëri një lojë tepër mbrojtëse, duke mos kënaqur 14.500 tifozët që kishin mbushur si rrallëherë “Loro Boriçin”. Nga kampi shkodran flitet se në rast dështimi në ndeshjen e sotme, trajneri Agim Canaj do t’i ketë të numëruara ditët në këtë ekip. Arsyeja duket e njëjtë me atë të presidentit të Dinamos pak muaj më parë dhe ka të bëjë me lojën shumë mbrojtëse të skuadrës. Në deklaratën e tij, presidenti Fushaj, si rrallëherë, ka prekur edhe kompetencat e trajnerit, duke thënë se ky i fundit gaboi me ndërrimet apo me mënyrën e vendosjes së lojtarëve në fushën e lojës. Avantazhi tjetër i Vllaznisë në ndeshjen e sotme, është fakti se Canaj e njeh mirë Dinamon.

(s.g/GazetaShqiptare/Balkanweb)